ಹಂಪಿ ಕಾವಲಿಗೆ ಅತ್ಯಾಧುನಿಕ 17 ಸಿಸಿ ಕ್ಯಾಮೆರಾ: ವಿಶ್ವ ಪರಂಪರೆ ತಾಣದಲ್ಲಿ ಪುಂಡ ಕಳ್ಳರ ಹಾವಳಿಗೆ ಕಡಿವಾಣ
ಹೈಲೈಟ್ಸ್‌:
- ಹಂಪಿಯಲ್ಲಿ ಕಳ್ಳರ ಹಾವಳಿ ತಡೆಗೆ ಪುರಾತತ್ವ ಇಲಾಖೆ ಕ್ರಮ
- ಪಾರಂಪರಿಕ ತಾಣ ಸಂರಕ್ಷಣೆಗೆ ಒತ್ತು
- ಹಂಪಿಯಲ್ಲಿ ಕಣ್ತೆರೆದ ಸಿಸಿ ಕ್ಯಾಮೆರಾ
ವಿಶ್ವ ಪಾರಂಪರಿಕ ತಾಣ ಹಂಪಿಯಲ್ಲಿ ನಿರ್ವಹಣೆ ಸಮಸ್ಯೆಯಿಂದ ಕಣ್ಮುಚ್ಚಿಕೊಂಡಿದ್ದ ಸಿಸಿ ಕ್ಯಾಮೆರಾಗಳು ಇದೀಗ ಕಣ್ತೆರೆದಿವೆ. ಇದರ ಜತೆಗೆ ನೂತನ 17 ಅತ್ಯಾಧುನಿಕ ಸಿಸಿ ಕ್ಯಾಮೆರಾ ಕಣ್ಣುಗಳು ಕೂಡ ಹಂಪಿ ಕಾವಲಿಗೆ ನಿಂತಿವೆ.
ಜಗತ್ತಿನ ಬಯಲು ವಸ್ತು ಸಂಗ್ರಹಾಲಯದವೆಂದೇ ಹೆಸರಾಗಿರುವ ಹಂಪಿಗೆ ಪ್ರತಿ ದಿನ ಸರಿಸುಮರು 3 ಸಾವಿರಕ್ಕೂ ಹೆಚ್ಚಿನ ಜನರು ಭೇಟಿ ನೀಡುತ್ತಾರೆ. ಇದರ ರಕ್ಷಣೆಗೆ ಭದ್ರತಾ ಸಿಬ್ಬಂದಿ, ಪೊಲೀಸರು, ಸಿಸಿ ಕ್ಯಾಮೆರಾ ಕಣ್ಗಾವಲು ಸೇರಿ ಭದ್ರತೆಗೆ ಸಂಬಂಧಿಸಿದಂತೆ ಹಲವಾರು ಕ್ರಮಗಳ ಹೊರತಾಗಿಯೂ ಕಳ್ಳತನ ಸೇರಿ ಕೆಲವೆಡೆ ಪುಂಡರ ಹಾವಳಿ ಪ್ರಕರಣಗಳು ಹೆಚ್ಚಾಗಿದ್ದವು.
ಅಲ್ಲದೇ, ಭಾರತೀಯ ಪುರಾತತ್ವ ಇಲಾಖೆಯ ಸಿಬ್ಬಂದಿಗಳ ನಿರ್ಲಕ್ಷತ್ರ್ಯದ ಪರಿಣಾಮ ಸಿಸಿ ಕ್ಯಾಮೆರಾಗಳು ಅಳವಡಿಸಿದ್ದರೂ ನಿರ್ವಹಣೆ ಮಾಡದ ಕಾರಣ ಕಣ್ಮುಚ್ಚಿಕೊಂಡಿದ್ದವು. ಇದೇ ಕಾರಣಕ್ಕೆ ಹಂಪಿಯ ಸ್ಮಾರಕ, ದೇಗುಲಗಳ ಬಳಿ ಕಳ್ಳತನ ನಡೆದಾಗಲೂ ಯಾವುದೇ ಕುರುಹು ಸಿಗದಂತಾಗಿತ್ತು.
ಸಿಸಿ ಕ್ಯಾಮೆರಾ ಕಾರ್ಯನಿರ್ವಹಿಸುತ್ತಿರಲಿಲ್ಲ
ಹಂಪಿಯ ಕಮಲ ಮಹಲ್‌ನಲ್ಲಿ ಶ್ರೀಗಂಧದ ಮರ ಮತ್ತು ಪಟ್ಟಣದ ಯಲ್ಲಮ್ಮ ದೇವಸ್ಥಾನದ ಕಳಸ ಕಳವು ಪ್ರಕರಣ ನಡೆದ ಸಂದರ್ಭ ಅಲ್ಲಿನ ಸಿಸಿ ಕ್ಯಾಮೆರಾಗಳು ಕಾರ್ಯನಿರ್ವಹಿಸುತ್ತಿರಲಿಲ್ಲ ಎಂಬ ದೂರು ಕೇಳಿ ಬಂದಿತ್ತು. ಕ್ಯಾಮೆರಾಗಳ ನಿರ್ವಹಣೆ ಕೊರತೆ, ವಿದ್ಯುತ್‌ ಸಮಸ್ಯೆ, ಜನರೇಟರ್‌ಗಳ ಸಮಸ್ಯೆಗಳಿಂದ ಈ ಕ್ಯಾಮೆರಾಗಳು ಕಣ್ಮುಚ್ಚಿಕೊಂಡಿದ್ದವು ಎನ್ನಲಾಗಿದ್ದು, ಈ ಘಟನೆಗಳ ಬಳಿಕ ಸ್ಮಾರಕ ಪ್ರಿಯರು ಮತ್ತು ಸ್ಥಳಿಯರು ಕಣ್ಣು ಕೆಂಪಾಗಿದ್ದವು.
ಐತಿಹಾಸಿಕ ಸ್ಥಳದಲ್ಲಿ ಕಳ್ಳತನ ಪ್ರಕರಣಗಳು ಹೆಚ್ಚಾಗುತ್ತಿದ್ದಂತೆ ಎಚ್ಚೆತ್ತುಕೊಂಡಿರುವ ಭಾರತೀಯ ಪುರಾತತ್ವ ಇಲಾಖೆ, ಸ್ಮಾರಕಗಳ ಸಂರಕ್ಷಣೆ ಮತ್ತು ಭದ್ರತೆ ದೃಷ್ಟಿಯಿಂದ ಇದ್ದ ಕ್ಯಾಮೆರಾಗಳ ದುರಸ್ತಿಯ ಜತೆಗೆ, ಆಯ್ದ ಪ್ರಮುಖ ಸ್ಮಾರಕಗಳ ಬಳಿ ನೂತನವಾಗಿ 17 ಅತ್ಯಾಧುನಿಕ ಸಿಸಿ ಕ್ಯಾಮೆರಾಗಳನ್ನು ಅಳವಡಿಸಿದೆ.
360 ಡಿಗ್ರಿ ಕೋನದಲ್ಲಿ ಚಿತ್ರ ಸೆರೆ
ಈ ನೂತನ ಕ್ಯಾಮೆರಾಗಳು ರಾತ್ರಿ ಸಮಯದಲ್ಲೂ ಉತ್ತಮ ಗುಣಮಟ್ಟದ ಚಿತ್ರಗಳನ್ನು ಸೆರೆಹಿಡಿಯುವ ಸಾಮರ್ಥ್ಯ ಹೊಂದಿವೆ. 360 ಡಿಗ್ರಿ ಕೋನದಲ್ಲಿ 500 ಮೀಟರ್‌ ರೇಡಿಯಸ್‌ ವ್ಯಾಪ್ತಿಯಲ್ಲಿ ಚಿತ್ರ ಸೆರೆ ಹಿಡಿಯುವ ವಿನೂತನ ತಂತ್ರಜ್ಞಾನ ಹೊಂದಿವೆ ಎಂದು ಇಲಾಖೆಯ ಹಿರಿಯ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
ಸದ್ಯ ಹಂಪಿಯಲ್ಲಿ 120 ಭದ್ರತಾ ಸಿಬ್ಬಂದಿ ಮತ್ತು ಸ್ಥಳೀಯ ಪೊಲೀಸರೂ ಭದ್ರತೆ ಒದಗಿಸುತ್ತಿದ್ದಾರೆ. ಪ್ರಸ್ತುತ 150 ಸಿಸಿ ಕ್ಯಾಮೆರಾಗಳನ್ನು ವಿಜಯ ವಿಠ್ಠಲ ದೇಗುಲ, ಶ್ರೀವಿರೂಪಾಕ್ಷೇಶ್ವರ ದೇಗುಲ, ಲೋಟಸ್‌ ಮಹಲ್‌, ಹಾಗೂ ಇತರೆ ಪ್ರಮುಖ ಸ್ಥಳಗಳಲ್ಲಿ ಅಳವಡಿಸಲಾಗಿದೆ. ವಿನೂತನವಾಗಿ ಅಳವಡಿಸಿರುವ ಕ್ಯಾಮೆರಾಗಳ ಜತೆಗೆ ಎರಡು ಹೊಸ ಸ್ಥಳಗಳಲ್ಲಿ ಎದುರು ಬಸವಣ್ಣ ಮತ್ತು ಮಾತಂಗ ಪರ್ವತದ ಬಳಿ ಕ್ಯಾಮೆರಾ ಅಳವಡಿಸಲಾಗಿದೆ.
ಈ ಬಗ್ಗೆ ವಿಜಯ ಕರ್ನಾಟಕದೊಂದಿಗೆ ಮಾತನಾಡಿದ ಭಾರತೀಯ ಪುರಾತತ್ವ ಇಲಾಖೆಯ ಹಂಪಿ ವೃತ್ತದ ಅಧೀಕ್ಷಕ ನಿಹಿಲ್ ದಾಸ್, ಹಂಪಿಯಲ್ಲಿ ಸ್ಮಾರಕಗಳ ಸಂರಕ್ಷಣೆ ಮತ್ತು ಭದ್ರತೆ ದೃಷ್ಟಿಯಿಂದ ಅತ್ಯಾಧುನಿಕ ಸಿಸಿ ಕ್ಯಾಮೆರಾಗಳು ಮತ್ತು ದುರಸ್ತಿಗೊಳಗಾಗಿದ್ದ ಕ್ಯಾಮೆರಾಗಳನ್ನು ರಿಪೇರಿ ಮಾಡಿಸಲಾಗಿದೆ ಎಂದು ತಿಳಿಸಿದ್ದಾರೆ. ಕಳ್ಳತನ ಪ್ರಕರಣಗಳು ನಡೆದ ಬಳಿಕ ಈ ಕುರಿತು ಗಂಭೀರವಾಗಿ ಪರಿಗಣಿಸಿದ್ದು, 17 ಹೊಸ ಕ್ಯಾಮೆರಾಗಳನ್ನು ಆಯ್ದ ಪ್ರಮುಖ ಸ್ಮಾರಕಗಳ ಬಳಿ ಅಳವಡಿಸಲಾಗಿದೆ. ಈ ಕ್ಯಾಮೆರಾಗಳ ಸ್ಥಿತಿಗತಿಯನ್ನು ನಿರಂತರವಾಗಿ ಪರಿಶೀಲಿಸಿ, ಅಗತ್ಯ ಕ್ರಮ ಕೈಗೊಳ್ಳುವಂತೆ ಇಲಾಖೆಯ ಸಿಬ್ಬಂದಿಗಳಿಗೂ ಕೂಡ ಕಟ್ಟುನಿಟ್ಟಿನ ಎಚ್ಚರಿಕೆ ನೀಡಲಾಗಿದೆ ಎಂದು ಮಾಹಿತಿ ನೀಡಿದ್ದಾರೆ.
