ಬಿಗ್ಬಾಸ್ ಸೀಸನ್-8ರ ಬಿಗ್ ಸೀಕ್ರೆಟ್ ರಿವೀಲ್ ..! ಕನ್ಫೂಸ್ ಇಲ್ಲ ಗುರು, ಇವ್ರೆ ನೋಡಿ ದೊಡ್ ಮನೆಗೆ ಎಂಟ್ರಿ ಕೊಡ್ತಿರೋರು.!
ಕಿರುತೆರೆ ಲೋಕದಲ್ಲಿ ಫೇಮಸ್ ರಿಯಾಲಿಟಿ ಶೋ ಅಂದ್ರೆ ಓನ್ ಎಂಡ್ ಓನ್ಲಿ ‘ಬಿಗ್ ಬಾಸ್’. ಅದೆಷ್ಟೋ ರಿಯಾಲಿಟಿ ಶೋಗಳು ಬಂದು ಹೋಗಿವೆ. ಆದ್ರೆ ಬಿಗ್ಬಾಸ್ ಮಾತ್ರ ಅಂದಿನಿಂದ ಇಂದಿನವರೆಗೂ ಸಿಕ್ಕಾಪಟ್ಟೆ ಕ್ರೇಜ್ ಉಳಿಸಿಕೊಂಡಿದೆ. ತನ್ನದೇ ಆದ ವಿಭಿನ್ನ ಛಾಪು ಮೂಡಿಸಿ,ದೊಡ್ಡ ಹವಾ ಸೃಷ್ಟಿಸಿದ ಖ್ಯಾತಿ ‘ಬಿಗ್ಬಾಸ್’ನದ್ದು. ಭಾರತದ ಅನೇಕ ಭಾಷೆಗಳಲ್ಲಿ ಯಶಸ್ವಿಯಾಗಿರುವ ‘ಬಿಗ್ಬಾಸ್’ ರಿಯಾಲಿಟಿ ಶೋ 7 ವರ್ಷದ ಹಿಂದೆ ಕನ್ನಡಕ್ಕೂ ಕಾಲಿಟ್ಟಿತ್ತು. ಈಗ 7 ಸೀಸನ್ಗಳನ್ನು ಮುಗಿಸಿ ಇದೀಗ 8ನೇ ಸೀಸನ್ಗೆ ಕಾಲಿಟ್ಟಿದೆ.
15 ಮಂದಿಯನ್ನು ಅರಮನೆಯಂತಹ ಒಂಟಿಮನೆಯಲ್ಲಿ ಹೊರ ಜಗತ್ತಿನ ಸಂಪರ್ಕ ಇಲ್ಲದಂತೆ ಒಂದೇ ಮನೆಯಲ್ಲಿ ಕೂಡಿ ಹಾಕಿ ಅವ್ರ ಸ್ವಭಾವ ಹೇಗಿದೆ, ಹೇಗೆ ಪ್ರೀತಿಸ್ತಾರೆ, ಹೇಗೆ ಜಗಳ ಆಡ್ತಾರೆ ಅನ್ನುವುದರ ಜೊತೆಗೆ ಒಂದಿಷ್ಟು ಟಾಸ್ಕ್ಗಳನ್ನು ಕೊಟ್ಟು ವೀಕ್ಷಕರನ್ನು ಎಂಟರ್ಟೈನ್ ಮಾಡೋದೆ ಈ ಕಾರ್ಯಕ್ರಮದ ಕಾನ್ಸೆಪ್ಟ್. ಇನ್ನು ದೊಡ್ಮನೆ ನೋಡೋಕ್ಕೆ ಒಂಥರಾ ಚೆಂದ,ಕಲರ್ ಫುಲ್ ಲೈಟಿಂಗ್, ನೂರಾರು ಕ್ಯಾಮೆರಾಗಳು, ಡಿಫರೆಂಟ್ ಮಾದರಿಯ ಗಾರ್ಡನ್ ಸೇರಿದಂತೆ ಕಿಚನ್ ನೋಡುಗರನ್ನ ಸಿಕ್ಕಾಪಟ್ಟೆ ಅಟ್ರ್ಯಾಕ್ಟ್ ಮಾಡುತ್ತೆ. ಈ ಒಂಟಿ ಮನೆಯಲ್ಲಿ ಹೆಜ್ಜೆ ಇಟ್ಟಲ್ಲೆಲ್ಲಾ ನೂರಾರು ಕ್ಯಾಮೆರಾಗಳು, ಸ್ಪರ್ಧಿಗಳನ್ನೇ ಫೋಕಸ್ ಮಾಡ್ತಿರುತ್ತದೆ. 24 ಗಂಟೆಯೂ ಅವರ ಚಲನವಲನಗಳು ಕ್ಯಾಮೆರಾ ಕಣ್ಣುಗಳಲ್ಲಿ ಸೆರೆಯಾಗ್ತಿರುತ್ತದೆ.
‘ಬಿಗ್ಬಾಸ್’ಅಡ್ಡದಿಂದ ಬಂತು ಸ್ವೀಟ್ ನ್ಯೂಸ್..! ಫೆಬ್ರವರಿ 28ಕ್ಕೆ ಶುರುವಾಗುತ್ತಾ ‘ಬಿಗ್ಬಾಸ್-8’..?
ಪ್ರತಿ ವರ್ಷವೂ ಕನ್ನಡ ಕಿರುತೆರೆ ಪ್ರೇಕ್ಷಕರಿಗೆ ‘ಬಿಗ್ ಬಾಸ್’ ರಿಯಾಲಿಟಿ ಶೋ ಭರಪೂರ ಮನರಂಜನೆ ನೀಡುತ್ತ ಬಂದಿದೆ. ಈವರೆಗೂ 7 ಸೀಸನ್ಗಳನ್ನು ಯಶಸ್ವಿಯಾಗಿ ಪೂರೈಸಿದೆ. ಇದ್ರಂತೆ ಈಗ ಬಿಗ್ಬಾಸ್ ಸೀಸನ್ 8 ಶುರುವಾಗೋಕ್ಕೆ ಕೌಂಟ್ಡೌನ್ ಶುರುವಾಗಿದೆ. ಫೆಬ್ರವರಿ 8ಕ್ಕೆ ಬಿಗ್ಬಾಸ್ ಅವೃತ್ತಿ 8ರ ಪ್ರೋಮೋ ರಿಲೀಸ್ ಆಗಿತ್ತು. ಈ ಪ್ರೋಮೋ ನೋಡಿದ ಅಭಿಮಾನಿಗಳು ಯಾವಾಗ ದೊಡ್ಮನೆ ಆಟ ಶುರುವಾಗುತ್ತೆ ಅಂತ ದಿನ ಎಣಿಸುತ್ತಿದ್ರು. ಈಗ ಬಿಗ್ಬಾಸ್ ಫ್ಯಾನ್ಸ್ ಕಾತುರಕ್ಕೆ ತೆರೆಬಿದ್ದಿದೆ. ಯೆಸ್ ಬಿಗ್ಬಾಸ್ ಸೀಸನ್ 8 ಇದೇ ಫೆಬ್ರವರಿ 28ಕ್ಕೆ ಗ್ರ್ಯಾಂಡ್ ಓಪನಿಂಗ್ ಪಡೆದುಕೊಳ್ಳುವ ಸಾಧ್ಯತೆಯಿದೆ.
ಡೆಡ್ಲಿ ಕೋವಿಡ್ ಆಟಕ್ಕೆ ಚೆಕ್ಮೇಟ್ ಇಡುತ್ತಾ ಬಿಗ್ಬಾಸ್..?
ಡೆಡ್ಲಿ ಕೊರೋನಾ ಹಾವಳಿ ಇನ್ನೂ ಕಡಿಮೆಯಾಗಿಲ್ಲ. ಹೀಗಾಗಿ ದೊಡ್ಮನೆಗೆ ಹೋಗುವ ಸ್ಪರ್ಧಿಗಳನ್ನ 15 ದಿನಗಳ ಕಾಲ ಕ್ವಾರೆಂಟೈನ್ನಲ್ಲಿ ಇರಿಸಿ, ನಂತ್ರ ಕೋವಿಡ್ ಟೆಸ್ಟ್ ಆದ್ಮೇಲೆ ಬಿಗ್ಬಾಸ್ ಶುರುವಾಗಲಿದಿಯಂತೆ. ಕೆಲ ಮೂಲಗಳ ಪ್ರಕಾರ ಈಗಾಗಲೇ ಸ್ಪರ್ಧಿಗಳ ಆಯ್ಕೆ ಪ್ರಕ್ರಿಯೆ ಕಂಪ್ಲೀಟ್ ಆಗಿದ್ದು, ಎಲ್ಲಾ ಸ್ಪರ್ಧಿಗಳು ಕ್ವಾರೆಂಟೈನ್ನಲ್ಲಿದ್ದಾರೆ ಅನ್ನೋ ಸುದ್ದಿಯಿದೆ.
ಅರೇ ಇದೆಲ್ಲಾ ಓಕೆ ಬಿಗ್ಬಾಸ್ ಮನೆಯೊಳಗೆ ಯಾರ್ ಹೋಗ್ತಾರೆ ಅಂತ ಕೇಳೋಕ್ಕೆ ವೈಟ್ ಮಾಡ್ತಿದ್ದಿರಲ್ವ. ಹೌದು ನಿಮ್ಮ ನಿರೀಕ್ಷೆಯಂತೆ ಈ ಬಾರಿ ಒಂಟಿ ಮನೆಯೊಳಗೆ ಹೋಗುವರು ಸ್ಟಾರ್ ಆ್ಯಕ್ಟರ್ಸ್ಗಳೇ..
ಬಿಗ್ ಮನೆಯಲ್ಲಿ ಅಖಿಲಾಂಡೇಶ್ವರಿ ಅಬ್ಬರ ಇರುತ್ತಾ..?
ಇತ್ತಿಚಿನ ದಿನಗಳಲ್ಲಿ ಅಖಿಲಾಂಡೇಶ್ವರಿ ಅನ್ನೋ ಹೆಸ್ರು ಕೇಳಿದ್ರೆ ಸಾಕು ನಮ್ಮಗೆ ಥಟ್ ಅಂತ ನೆನಪಾಗೋದು ವಿನಯ ಪ್ರಸಾದ್. 80-90ರ ದಶಕದಲ್ಲಿ ಸ್ಯಾಂಡಲ್ವುಡ್ನಲ್ಲಿ ದಿಗ್ಗಜರ ಜೊತೆ ನಟಿಸಿ ಸೈ ಎನ್ನಿಸಿಕೊಂಡ ಚೆಲುವೆ. ಅಂದಿನಿಂದ ಇಂದಿನವರೆಗೂ ವಿನಯ ಪ್ರಸಾದ್ ಬಣ್ಣ ಹಚ್ಚುವುದನ್ನ ಬಿಟ್ಟಿಲ್ಲ. ಈಗಲೂ ಸಹ ಖಾಸಗಿ ವಾಹಿನಿಯಲ್ಲಿ ಮೂಡಿಬರ್ತಿರೋ ‘ಪಾರು’ ಎಂಬ ಸೀರಿಯಲ್ನಲ್ಲಿ ಅಖಿಲಾಂಡೇಶ್ವರಿ ಪಾತ್ರದ ಮೂಲಕ ಸಾವಿರಾರು ಅಭಿಮಾನಿಗಳ ಮನಸ್ಸು ಗೆದ್ದಿದ್ದಾರೆ. ಇಂತಹ ಅದ್ಭುತ ಕಲಾವಿದೆ, ಹಿರಿಯ ನಟಿ ಬಿಗ್ ಬಾಸ್ ಸೀಸನ್ 8ಕ್ಕೆ ಎಂಟ್ರಿಕೊಡಲಿದ್ದಾರಂತೆ.
ದೊಡ್ಮನೆಯಲ್ಲಿ ರವಿಶಂಕರ್ ಕಾಮಿಡಿ ಜೋರಾಗಿರುತ್ತೆ..?
ಸಿಲ್ಲಿ-ಲಲ್ಲಿ ಸೀರಿಯಲ್ನ ಡಾಕ್ಟರೇ ಪಾತ್ರದ ಮೂಲಕ ಮನೆ ಮಾತಾಗಿರೋ ರವಿಶಂಕರ್, ಬರೀ ಕಿರುತೆರೆ ಮಾತ್ರವಲ್ಲದೇ ಬೆಳ್ಳಿತೆರೆಯಲ್ಲಿ ಕಾಮಿಡಿ ಮೂಲಕ ನಕ್ಕು ನಲಿಸಿದ್ದಾರೆ. ಈಗಲೂ ಸಹ ಕೆಲ ಸಿನಿಮಾಗಳ ಮೂಲಕ ಪ್ರೇಕ್ಷಕರನ್ನ ರಂಜಿಸ್ತಿರೋ ರವಿಶಂಕರ್, ದೊಡ್ಮನೆಯೊಳಗೆ ಕಾಲಿಡ್ತಾರಂತೆ.
ಒಂಟಿ ಮನೆಯೊಳಗೆ ಅನುಷಾ ರಂಗನಾಥ್ ರಂಜಿಸ್ತಾರಾ..?
ಕಿರುತೆರೆ ಮೂಲಕ ಬಣ್ಣ ಹಚ್ಚಿ ಬೆಳ್ಳಿ ತೆರೆಯಲ್ಲಿ ಗಮನ ಸೆಳೆಯುತ್ತಿರೋ ಅಶಿಕಾ ರಂಗನಾಥ್ ಸಹೋದರಿ ಅನುಷಾ ರಂಗನಾಥ್, ಈ ಬಾರಿ ಬಿಗ್ ಮನೆಯೊಳಗೆ ಹೋಗುವ ಎಲ್ಲಾ ಲಕ್ಷಣಗಳು ಕಾಣ್ತಿದೆ. ಯೆಸ್ ಅನುಷಾ ರಂಗನಾಥ್ ಸದ್ಯ ಕೆಲ ಸಿನಿಮಾಗಳಲ್ಲಿ ಬ್ಯುಸಿಯಾಗಿದ್ದಾರಂತೆ. ಇದ್ರ ಬೆನ್ನಲ್ಲೇ ಬಿಗ್ ಬಾಸ್ ಸೀಸನ್ 8ಕ್ಕೆ ಗ್ರೀನ್ ಸಿಗ್ನಲ್ ಕೊಟ್ಟಿದ್ದಾರೆ ಅನ್ನೋ ಸುದ್ದಿ, ಸೋಷಿಯಲ್ ಮೀಡಿಯಾದಲ್ಲಿ ಸಿಕ್ಕಾಪಟ್ಟೆ ಜೋರಾಗಿ ಸೌಂಡ್ ಮಾಡ್ತಿದೆ.
ಬಿಗ್ ಮನೆಯೊಳಗೆ ಬ್ರಹ್ಮಗಂಟು ಗೀತಾ ಎಂಟ್ರಿ ಕನ್ಫರ್ಮಾ..?
ಬ್ರಹ್ಮಗಂಟು ಸೀರಿಯಲ್ ಮೂಲಕ ರಾಜ್ಯಾದ್ಯಂತ ಫೇಮಸ್ ಆಗಿರೋ ಕಿರುತೆರೆ ನಟಿ ಗೀತಾ ಭಾರತಿ ಭಟ್, ಸಿಕ್ಕಾಪಟ್ಟೆ ಟ್ಯಾಲೆಂಟೆಡ್ ಹುಡುಗಿ. ಗೀತಾ ಬರೀ ಆ್ಯಕ್ಟರ್ ಮಾತ್ರವಲ್ಲ ಅದ್ಭುತ ಗಾಯಕಿ ಕೂಡ. ಇಂತಹ ಅದ್ಭುತ ಕಲಾವಿದೆ ಬಿಗ್ಬಾಸ್-8ರ ಆವೃತ್ತಿಗೆ ಹೋಗೋದು ಪಕ್ಕಾ ಅಂತಿದೆ ಕೆಲ ಮೂಲಗಳು.
ದೊಡ್ಮನೆಯಲ್ಲಿ ಮ್ಯಾಜಿಕ್ ಮಾಡ್ತಾರಾ ಶುಭಾ ಪೂಂಜಾ..!
ಸ್ಯಾಂಡಲ್ವುಡ್ನಲ್ಲಿ ಸಾಕಷ್ಟು ಸಿನಿಮಾಗಳಲ್ಲಿ ಬಣ್ಣ ಹಚ್ಚಿ, ಬಬ್ಲಿ-ಬಬ್ಲಿ ನಟನೆ ಮೂಲಕ ಪಡ್ಡೆ ಹುಡುಗರ ನಿದ್ದೆ ಕೆಡಿಸಿದ ಚೆಲುವೆ ಶುಭಾ ಪೂಂಜಾ.. ಸದ್ಯ ಕೆಲ ಸಿನಿಮಾ ಹಾಗೂ ವೈಯಕ್ತಿಕ ಲೈಫ್ನಲ್ಲಿ ಬ್ಯುಸಿಯಾಗಿರೋ ಶುಭಾ, ಬಿಗ್ ಬಾಸ್ ಸೀಸನ್ 8ಕ್ಕೆ ಎಂಟ್ರಿಕೊಡಲಿದ್ದಾರಂತೆ.
ಬಿಗ್ಬಾಸ್ಗೆ ಹೋಗ್ತಾರಾ ‘ಎಕ್ಸ್ಕ್ಯೂಸ್ ಮೀ’ ನಟ..!
ಕನ್ನಡದಲ್ಲಿ ಬಾಲಕಲಾವಿದನಾಗಿ ಬಣ್ಣ ಹಚ್ಚಿದ ಸುನೀಲ್ ರಾವ್, ಅನೇಕ ಸಿನಿಮಾ ಸೇರಿದಂತೆ ಕಿರುತೆರೆ ಲೋಕದಲ್ಲಿ ತನ್ನದೇ ನಟನೆಯ ಛಾಪು ಮೂಡಿಸಿದ ಸುನೀಲ್ ರಾವ್, ಒಳ್ಳೆಯ ಗಾಯಕ ಕಡ. ಇತ್ತೀಚೆಗೆ ವೆಬ್ ಸೀರಿಸ್ ಮೂಲಕ ಗಮನ ಸೆಳೆದ ಸುನೀಲ್ ರಾವ್, ಈ ಬಾರಿ ದೊಡ್ಮನೆಯೊಳಗೆ ಎಂಟ್ರಿ ಕೊಟ್ಟು ಮ್ಯಾಜಿಕ್ ಮಾಡ್ತಾರಂತೆ.
ಬಿಗ್ಬಾಸ್ಗೆ ಡೆಡ್ಲಿ ನಿರ್ದೇಶಕ ಎಂಟ್ರಿ ಕೊಡ್ತಾರಂತೆ..?
ಕೆಲ ಸಿನಿಮಾಗಳ ಮೂಲಕ ವಿಭಿನ್ನ ಕೈಚಳಕ ತೋರಿಸಿದ, ನಿರ್ದೇಶಕ ರವಿ ಶ್ರೀವಾತ್ಸವ್, ಕೆಲ ಡೇರಿಂಗ್ ಸ್ಟೇಟ್ಮೆಂಟ್ಗಳಿಂದ ಸಿಕ್ಕಾಪಟ್ಟೆ ಸದ್ದು ಮಾಡಿದ್ದಾರೆ. ಈಗ ಈ ಖ್ಯಾತ ನಿರ್ದೇಶಕ ರವಿ ಶ್ರೀವಾತ್ಸವ್ ಬಿಗ್ಬಾಸ್ ಸೀಸನ್ 8ಕ್ಕೆ ಹೋಗಿ, ಅಲ್ಲಿಯೂ ಆಟದ ಮೂಲಕ ಆ್ಯಕ್ಷನ್ ಕಟ್ ಹೇಳ್ತಾರಂತೆ ಅನ್ನೋ ಸುದ್ದಿಯಿದೆ.
