ಅಪ್ಪನ ಜಿಮ್‌ ಟ್ರೇನರ್‌ ಜೊತೆ ಲವ್‌ ಮಾಡುತ್ತಿರುವುದನ್ನು ಒಪ್ಪಿಕೊಂಡ ಆಮೀರ್‌ ಖಾನ್‌ ಪುತ್ರಿ ಇರಾ ಖಾನ್‌!
ಹೈಲೈಟ್ಸ್‌:
- ಖ್ಯಾತ ನಟ ಆಮೀರ್‌ ಖಾನ್‌ ಪುತ್ರಿ ಇರಾ ಖಾನ್‌
- ಫಿಟ್ನೆಸ್‌ ಟ್ರೇನರ್‌ ಜೊತೆ ಇರಾ ಪ್ರೀತಿ-ಪ್ರೇಮ
- ಪ್ರಿಯಕರನ ಜೊತೆಗಿರುವ ಫೋಟೋ ವೈರಲ್‌
- ನೂಪುರ್‌-ಇರಾ ಪ್ರೇಮ್ ಕಹಾನಿ ಬಹಿರಂಗ
ಬಾಲಿವುಡ್‌ ನಟ ಆಮೀರ್‌ ಖಾನ್‌ ಅವರ ಪುತ್ರಿ ಇರಾ ಖಾನ್‌ ಅವರು ಸೋಶಿಯಲ್‌ ಮೀಡಿಯಾದಲ್ಲಿ ಹೆಚ್ಚು ಸಕ್ರಿಯರಾಗಿದ್ದಾರೆ. ಡಿಪ್ರೆಷನ್‌ನಿಂದ ಹಿಡಿದು ಲೈಂಗಿಕ ಕಿರುಕುಳದವರೆಗೆ ಅನೇಕ ವಿಚಾರಗಳನ್ನು ಮುಕ್ತವಾಗಿ ಹಂಚಿಕೊಳ್ಳುವ ಅವರು ತಮ್ಮ ಬಾಯ್‌ಫ್ರೆಂಡ್‌ ವಿಷಯದಲ್ಲಿ ಇದುವರೆಗೂ ಮೌನ ವಹಿಸಿದ್ದರು. ಆದರೆ ಈಗ ವ್ಯಾಲೆಂಟೈನ್ಸ್‌ ಡೇ ಹತ್ತಿರ ಆಗುತ್ತಿರುವ ಈ ಸಂದರ್ಭದಲ್ಲಿ ಅವರು ಸತ್ಯ ಬಾಯಿಬಿಟ್ಟಿದ್ದಾರೆ.
ನಟ ಆಮೀರ್‌ ಖಾನ್‌ಗೆ ಜಿಮ್‌ ತರಬೇತಿ ನೀಡಲು ಬರುತ್ತಿದ್ದ ಫಿಟ್ನೆಸ್‌ ಟ್ರೇನರ್‌ ನೂಪುರ್‌ ಶಿಖಾರೆ ಜೊತೆ ಇರಾ ಖಾನ್‌ಗೆ ಆಪ್ತತೆ ಬೆಳೆದಿತ್ತು. ಇಬ್ಬರೂ ತುಂಬ ಆತ್ಮೀಯವಾಗಿ ಇರುವ ಫೋಟೋಗಳನ್ನು ಸೋಶಿಯಲ್‌ ಮೀಡಿಯಾದಲ್ಲಿ ಹಂಚಿಕೊಳ್ಳುತ್ತಿದ್ದರು. ಶುಭ ಸಮಾರಂಭಗಳಲ್ಲಿ ಒಟ್ಟಾಗಿ ಕಾಣಿಸಿಕೊಳ್ಳುತ್ತಿದ್ದರು. ಆಗಲೇ ಈ ಜೋಡಿಯ ಮೇಲೆ ಜನರಿಗೆ ಅನುಮಾನ ಮೂಡಿತ್ತು. ಆ ಅನುಮಾನ ಈಗ ನಿಜವಾಗಿದೆ.
ತಾವು ನೂಪುರ್‌ ಜೊತೆ ಇರುವ ಹಲವು ಫೋಟೋಗಳನ್ನು ಈಗ ಸೋಶಿಯಲ್‌ ಮೀಡಿಯಾದಲ್ಲಿ ಅಪ್‌ಲೋಡ್‌ ಮಾಡಿಕೊಂಡಿರುವ ಇರಾ ಅವರು ತಮ್ಮ ಪ್ರೀತಿಯನ್ನು ಬಹಿರಂಗಪಡಿಸಿದ್ದಾರೆ. ಪ್ರಾಮಿಸ್‌ ಡೇ ಪ್ರಯುಕ್ತ ಅವರು ಪ್ರಿಯಕರನಿಗೆ ಪ್ರೀತಿಯ ಸಂದೇಶ ತಿಳಿಸಿದ್ದಾರೆ. ನೂಪುರ್‌ ಅವರ ಕಣ್ಣಲ್ಲಿ ಕಣ್ಣಿಟ್ಟು ನೋಡುತ್ತಿರುವ ಫೋಟೋಗಳ ಜೊತೆ ‘ನಿನಗೆ ಮತ್ತು ನಿನ್ನ ಜೊತೆ ಪ್ರಾಮಿಸ್‌ ಮಾಡಲು ಗೌರವದ ಭಾವ ಮೂಡುತ್ತದೆ’ ಎಂದು ಇರಾ ಕ್ಯಾಪ್ಷನ್‌ ನೀಡಿದ್ದಾರೆ.
ಇರಾ ಮಾಡಿರುವ ಈ ಪೋಸ್ಟ್‌ಗೆ ಅನೇಕ ಸೆಲೆಬ್ರಿಟಿಗಳು ಕಾಮೆಂಟ್‌ ಮಾಡಿದ್ದಾರೆ. ಫಾತಿಮಾ ಸನಾ ಶೇಕ್‌, ಗುಲ್ಷನ್‌ ದೇವಯ್ಯ, ಕರಣ್‌ವೀರ್‌ ಬೋಹ್ರಾ ಸೇರಿದಂತೆ ಅನೇಕರು ವಿಶ್‌ ಮಾಡಿದ್ದಾರೆ. ಅಭಿಮಾನಿಗಳು ಕೂಡ ಈ ಜೋಡಿಗೆ ಶುಭ ಹಾರೈಸಿದ್ದಾರೆ. ಇರಾ ಮಾಡಿರುವ ಪೋಸ್ಟ್‌ ಅನ್ನು ನೂಪುರ್‌ ಕೂಡ ತಮ್ಮ ಇನ್‌ಸ್ಟಾಗ್ರಾಮ್‌ ಸ್ಟೋರಿಯಲ್ಲಿ ಶೇರ್‌ ಮಾಡಿಕೊಳ್ಳುವ ಮೂಲಕ ತಮ್ಮಿಬ್ಬರ ಪ್ರೀತಿಯನ್ನು ಖಚಿತಪಡಿಸಿದ್ದಾರೆ.
