125 ವರ್ಷ ಹಳೆಯ ಪಕ್ಷ ಸೋಲಿಸಿ ಆಪ್‌ಗೆ ಮಣೆ, ವ್ಯಂಗ್ಯವಾಡಿದ ಕೇಜ್ರಿವಾಲ್‌
ಹೊಸದಿಲ್ಲಿ: ಗುಜರಾತ್‌ ಸ್ಥಳೀಯ ಸಂಸ್ಥೆಗಳ ಚುನಾವಣೆಯಲ್ಲಿ ಸೂರತ್‌ ನಗರದ ಮತದಾರರು 125 ವರ್ಷಗಳಷ್ಟು ಹಳೆಯ ಪಕ್ಷವಾದ ಕಾಂಗ್ರೆಸ್‌ ಅನ್ನು ಸೋಲಿಸಿ ಪ್ರತಿಪಕ್ಷದ ಸ್ಥಾನವನ್ನು ಆಮ್‌ ಆದ್ಮಿ ಪಾರ್ಟಿಗೆ (ಆಪ್‌) ನೀಡಿದ್ದಾರೆ ಎಂದು ದಿಲ್ಲಿ ಮುಖ್ಯಮಂತ್ರಿ ಅರವಿಂದ್‌ ಕೇಜ್ರಿವಾಲ್‌ ಹೇಳಿದ್ದಾರೆ.
ಪರೋಕ್ಷವಾಗಿ ಕಾಂಗ್ರೆಸ್‌ ಪಕ್ಷವನ್ನು ಕಾಲೆಳೆದಿರುವ ಅವರು , ”ಈಗ ಗೆದ್ದಿರುವ ಪ್ರತಿಯೊಬ್ಬ ಆಮ್‌ ಆದ್ಮಿ ಪಾರ್ಟಿ ಅಭ್ಯರ್ಥಿಯು ಪ್ರಾಮಾಣಿಕವಾಗಿ ದುಡಿದು ಸೂರತ್‌ ಜನತೆಯ ಋುಣ ಸಂದಾಯ ಮಾಡುವರು ಎಂದು ಭರವಸೆ ನೀಡುತ್ತೇನೆ,” ಎಂದರು.
ಒಟ್ಟು 576 ಸೀಟುಗಳ ಸ್ಥಳೀಯ ಸಂಸ್ಥೆಗಳ ಚುನಾವಣೆಯ ಫಲಿತಾಂಶ ಭಾನುವಾರ ಹೊರಬಿದ್ದಿದ್ದು, ಬಿಜೆಪಿಗೆ ಅತಿಹೆಚ್ಚು ಅಂದರೆ 483 ಸೀಟುಗಳಲ್ಲಿ ಜಯಸಿಕ್ಕಿದೆ. ಕಾಂಗ್ರೆಸ್‌ಗೆ 55 ಸೀಟುಗಳು, ಚೊಚ್ಚಲ ಬಾರಿ ಚುನಾವಣೆ ಎದುರಿಸಿದ ಆಪ್‌ಗೆ ಸೂರತ್‌ವೊಂದರಿಂದಲೇ 27 ಸೀಟುಗಳಲ್ಲಿ ವಿಜಯ ದಕ್ಕಿದೆ. ಸೂರತ್‌ನಲ್ಲಿ ಕಾಂಗ್ರೆಸ್‌ಗೆ ಒಂದೇ ಒಂದು ಸೀಟು ಸಿಕ್ಕಿಲ್ಲ. ಪಾಟಿದಾರ್‌ ಅನಾಮತ್‌ ಆರಕ್ಷಣ್‌ ಸಮಿತಿ ಈ ಬಾರಿ ಕಾಂಗ್ರೆಸ್‌ಗೆ ಮತ ನೀಡದಂತೆ ತೆಗೆದುಕೊಂಡ ತೀರ್ಮಾನದಿಂದ ‘ಕೈ’ ಪಾಳಯಕ್ಕೆ ಭಾರಿ ಹಿನ್ನಡೆ ಉಂಟಾಗಿದೆ.
