ಶಾಲೆಗಳನ್ನು ಮಾದರಿಯನ್ನಾಗಿಸ್ತೀನಿ: 3 ಸರಕಾರಿ ಶಾಲೆಗಳನ್ನು ದತ್ತು ಪಡೆದ ಶಾಸಕ ಶರತ್‌ ಬಚ್ಚೇಗೌಡ
ಹೊಸಕೋಟೆ: ತಾಲೂಕಿನಲ್ಲಿ 3 ಸರಕಾರಿ ಶಾಲೆಗಳನ್ನು ಶಾಸಕ ಶರತ್‌ ಬಚ್ಚೇಗೌಡ ದತ್ತು ಪಡೆದಿದ್ದು, ಈ ಬಗ್ಗೆ ಶಿಕ್ಷಣ ಸಚಿವ ಎಸ್‌. ಸುರೇಶ್‌ಕುಮಾರ್‌, ಇಲಾಖೆಯ ಆಯುಕ್ತರು, ಪ್ರಾಥಮಿಕ ಹಾಗೂ ಪ್ರೌಢಶಿಕ್ಷಣ ಇಲಾಖೆಯ ಪ್ರಧಾನ ಕಾರ್ಯದರ್ಶಿ ಸಹಿ ಮಾಡಿರುವ ದತ್ತು ಸ್ವೀಕಾರ ಪತ್ರವನ್ನು ಬಿಇಒ ಎಸ್‌.ಎನ್‌. ಕನ್ನಯ್ಯ ಶಾಸಕರಿಗೆ ನೀಡಿದರು.
ದತ್ತು ಪಡೆದ ಶಾಲೆಗಳು: ನಗರದ ಜಿಕೆಬಿಎಂಎಸ್‌ ಶಾಲೆ, ದೊಡ್ಡದುನ್ನಸಂದ್ರದ ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆ, ನಂದಗುಡಿಯ ಕರ್ನಾಟಕ ಪಬ್ಲಿಕ್‌ ಶಾಲೆ. ಪತ್ರ ಸ್ವೀಕರಿಸಿದ ಶಾಸಕ ಶರತ್‌ ಬಚ್ಚೇಗೌಡ ಮಾತನಾಡಿ, ಮೂರು ಶಾಲೆಗಳ ಸರ್ವಾಂಗೀಣ ಅಭಿವೃದ್ಧಿಗೆ ಗಮನ ಹರಿಸಿ ಮಕ್ಕಳ ಕಲಿಕಾ ಸಾಮರ್ಥ್ಯ ಹೆಚ್ಚಿಸುವುದು, ವೈಯಕ್ತಿಕವಾಗಿ ಹಾಗೂ ದಾನಿಗಳ ಸಹಕಾರದೊಂದಿಗೆ ಅಗತ್ಯ ಮೂಲಸೌಲಭ್ಯಗಳನ್ನು ಕಲ್ಪಿಸಲಾಗುವುದು.
ಶಾಲೆಗಳನ್ನು ಮಾದರಿಯನ್ನಾಗಿಸಿ ಸಮುದಾಯದಲ್ಲಿ ಸರಕಾರಿ ಶಾಲೆಗಳ ಬಗ್ಗೆ ಅಭಿಮಾನ ಮೂಡಿಸುವ ಮೂಲಕ ದಾಖಲಾತಿ ವೃದ್ಧಿಗೆ ಶ್ರಮಿಸಲಾ ಗುವುದು. ಈಗಾಗಲೇ ತಾಲೂಕಿನಲ್ಲಿ ಬಹಳಷ್ಟು ಶಾಲೆಗಳಿಗೆ ಖಾಸಗಿ ಸಂಸ್ಥೆಗಳ ಸಾಮಾಜಿಕ ಹೊಣೆಗಾರಿಕೆ ಯೋಜನೆಯಡಿ ಶಾಲಾ ಕಟ್ಟಡ, ಕೊಠಡಿ, ಶೌಚಾಲಯ ನಿರ್ಮಾಣ, ಗ್ರಂಥಾಲಯ ವ್ಯವಸ್ಥೆ ಮಾಡಲಾಗುತ್ತಿದೆ ಎಂದರು.
