ಕೊರೊನಾ ಚಿಕಿತ್ಸೆಗೆ ಡಿಆರ್‌ಡಿಒ ಸಂಜೀವಿನಿ ಬಗ್ಗೆ ನಿಮಗೆಷ್ಟು ಗೊತ್ತು?: ಆಕ್ಸಿಜನ್‌ ಸಪೋರ್ಟ್‌ ಬೇಕಿಲ್ಲ, ಪುಡಿಯಿಂದ ದೇಹಕ್ಕೆ ರಕ್ಷಾ ಕವಚ!
ಹೈಲೈಟ್ಸ್‌:
- ಡಿಆರ್‌ಡಿಒ ತಯಾರಿಸಿರುವ ಕೊರೊನಾ ನಿರೋಧಕ ಔಷಧ ಹೇಗೆ ಕಾರ್ಯನಿರ್ವಹಿಸುತ್ತೆ?
- ಈ ಔಷಧ ತೆಗೆದುಕೊಂಡರೆ ಕೃತಕ ಆಕ್ಸಿಜನ್‌ ಸಪೋರ್ಟ್‌ ಬೇಕಿಲ್ಲ
- ಕೊರೊನಾ ಸೋಂಕಿತರ ಶೀಘ್ರ ಚೇತರಿಕೆಗೆ ಸಹಾಯಕವಾಗಲಿದೆ ಈ ಪೌಡರ್‌
ಹೊಸದಿಲ್ಲಿ: ಸಾಂಕ್ರಾಮಿಕ ವಿರುದ್ಧ ಹೋರಾಟಕ್ಕೆ ಸಿದ್ಧಗೊಳ್ಳಲು ಪ್ರಧಾನಿ ನರೇಂದ್ರ ಮೋದಿ ಅವರ ಸೂಚನೆ ಮೇರೆಗೆ ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆ (ಡಿಆರ್‌ಡಿಒ) ತಯಾರಿಸಿದ ಕೊರೊನಾ ನಿರೋಧಕ ಔಷಧದ ತುರ್ತು ಸಂದರ್ಭಗಳಲ್ಲಿ ಬಳಕೆಗೆ ಅವಕಾಶ ನೀಡಲಾಗಿದೆ. ಔಷಧಗಳ ಗುಣಮಟ್ಟ ನಿಯಂತ್ರಣ ಪ್ರಾಧಿಕಾರ (ಡಿಸಿಜಿಐ) ಈ ಔಷಧದ ಬಳಕೆಗೆ ಸಮ್ಮತಿ ಸೂಚಿಸಿದೆ.
ದಾಖಲೆ ಸೋಂಕು ಮತ್ತು ಸೋಂಕಿತರ ಚಿಕಿತ್ಸೆಗೆ ಬಳಸಲಾಗುತ್ತಿದ್ದ ರೆಮ್‌ಡೆಸಿವಿರ್‌ನಂತ ಔಷಧಗಳ ಕೊರತೆಯಿಂದ ರೋಗಿಗಳು ಬಲಿಯಾಗುತ್ತಿರುವ ಸಂದರ್ಭದಲ್ಲಿ ಡಿಆರಡಿಒ ಔಷಧವು ಸಂಜೀವಿನಿಯಾಗುವ ಸಾಧ್ಯತೆಯಿದೆ.
ಡಿಆರ್‌ಡಿಒದ ಪ್ರಯೋಗಾಲಯ ಇನ್‌ಸ್ಟಿಟ್ಯೂಟ್‌ ಆಫ್‌ ನ್ಯುಕ್ಲಿಯರ್‌ ಮೆಡಿಸಿನ್‌ ಮತ್ತು ಅಲೈಡ್‌ ಸೈನ್ಸಸ್‌ (ಇನ್ಮಾಸ್‌) ಮತ್ತು ಹೈದರಾಬಾದಿನ ಡಾ.ರೆಡ್ಡಿ ಲ್ಯಾಬರೋಟರೀಸ್‌ ಸಹಭಾಗಿತ್ವದಲ್ಲಿಔಷಧವನ್ನು ಅಭಿವೃದ್ಧಿಪಡಿಸಲಾಗಿದೆ. ಸದ್ಯಕ್ಕೆ ಇದನ್ನು 2-ಡಿಯೊಕ್ಸಿ-ಡಿ-ಗ್ಲುಕೋಸ್‌ (2-ಡಿಜಿ) ಎಂದು ಕರೆಯಲಾಗತ್ತಿದೆ. ಇದನ್ನು ಪ್ರಸ್ತುತ ನೀಡಲಾಗುತ್ತಿರುವ ಚಿಕಿತ್ಸೆಯ ಜತೆಗೆ ಪೂರಕವಾಗಿ ನೀಡಬಹುದೆಂದು ಸಂಸ್ಥೆಯು ತಿಳಿಸಿದೆ.
ಆಕ್ಸಿಜನ್‌ ಸಪೋರ್ಟ್‌ ಬೇಕಿಲ್ಲ!
ಮೂರು ಸುತ್ತಿನ ಪ್ರಯೋಗ ಪೂರ್ಣಗೊಳಿಸಿರುವ ಈ ಔಷಧವು ಆಸ್ಪತ್ರೆಗಳಿಗೆ ದಾಖಲಾಗಿರುವ ಕೊರೊನಾ ಸೋಂಕಿತರ ಶೀಘ್ರ ಚೇತರಿಕೆಗೆ ನೆರವಾಗಲಿದೆ. ಪ್ರಮುಖವಾಗಿ ಆಕ್ಸಿಜನ್‌ ಅವಲಂಬಿತ ಸೋಂಕಿತರಿಗೆ ಹೆಚ್ಚು ಶಕ್ತಿ ನೀಡಿ ಸ್ವತಂತ್ರ ಉಸಿರಾಟಕ್ಕೆ ಸಹಾಯಕವಾಗಲಿದೆ. ಕೆಲವೇ ದಿನಗಳಲ್ಲಿ ಸೋಂಕಿತರ ಆರ್‌ಟಿಪಿಸಿಆರ್‌ ಕೂಡ ನೆಗೆಟಿವ್‌ ಬರುವಷ್ಟು ಪರಿಣಾಮಕಾರಿ ಎಂದು ಪ್ರಯೋಗದಲ್ಲಿ ಸಾಬೀತಾಗಿದೆ. ಆಸ್ಪತ್ರೆಗೆ ದಾಖಲಾಗುವುದನ್ನೂ ಈ ಔಷಧದ ಬಳಕೆಯಿಂದ ತಪ್ಪಿಸಬಹುದು ಎಂದು ಹಿರಿಯ ವಿಜ್ಞಾನಿಗಳು ತಿಳಿಸಿದ್ದಾರೆ.
ಜೈಪುರ: ನಿಯಮ ಪಾಲಿಸದೆ ಕೊರೊನಾ ಸೋಂಕಿತನ ಅಂತ್ಯಕ್ರಿಯೆ, ಕುಟುಂಬದ ನಿರ್ಲಕ್ಷ್ಯಕ್ಕೆ ಒಂದೇ ಗ್ರಾಮದ 21 ಮಂದಿ ಬಲಿ!
ಕರ್ನಾಟಕದಲ್ಲೂ ಪ್ರಯೋಗ!
2020ರ ಏಪ್ರಿಲ್‌ನಲ್ಲಿ ಆರಂಭವಾದ 2-ಡಿಜಿಯ ಮೊದಲ ಹಂತದ ಪ್ರಯೋಗ, ಅಕ್ಟೋಬರ್‌ನಲ್ಲಿ ಎರಡನೇ ಹಂತವನ್ನು ಕೂಡ ಪೂರ್ಣಗೊಳಿಸಿದೆ. ಫೇಸ್‌2ಬಿ ಪ್ರಯೋಗವನ್ನು ದೇಶದ 11 ಆಸ್ಪತ್ರೆಗಳಲ್ಲಿ ಮುಗಿಸಿ, ಮೂರನೇ ಹಂತದ ಪ್ರಯೋಗವನ್ನು 2020ರ ಡಿಸೆಂಬರ್‌ನಿಂದ 2021ರ ಮಾರ್ಚ್‌ವರೆಗೆ ದೇಶಾದ್ಯಂತ 27 ಕೊರೊನಾ ಚಿಕಿತ್ಸೆಗೆ ಸೀಮಿತ ಆಸ್ಪತ್ರೆಗಳಲ್ಲಿ ನಡೆಸಲಾಗಿದೆ. ಕರ್ನಾಟಕ, ಉತ್ತರಪ್ರದೇಶ, ಆಂಧ್ರಪ್ರದೇಶ ಸೇರಿದಂತೆ ಒಟ್ಟು 10 ರಾಜ್ಯಗಳಲ್ಲಿನ ಸೋಂಕಿತರ ಮೇಲೆ ಪ್ರಯೋಗ ನಡೆಸಲಾಗಿದೆ ಎಂದು ಡಿಸಿಜಿಐಗೆ ವರದಿ ಸಲ್ಲಿಕೆಯಾಗಿದೆ.
ಹೇಗೆ ಕೆಲಸ ಮಾಡುತ್ತದೆ?
2 ಡಿಜಿಯನ್ನು ಸೋಂಕಿತರಿಗೆ ಉಪಯೋಗವಾಗುವಂತೆ ಸುಲಭವಾಗಿ ಬಾಯಿಗೆ ಹಾಕಿಕೊಳ್ಳುವ ಪೌಡರ್‌ ಮಾದರಿಯಲ್ಲಿ ಅಭಿವೃದ್ಧಿಪಡಿಸಲಾಗಿದೆ. ಇದು ನೀರಿನಲ್ಲಿ ಸುಲಭವಾಗಿ ಕರಗುತ್ತದೆ. ಹಾಗಾಗಿ ನೀರಿಗೆ ಹಾಕಿಕೂಂಡು ಸೇವಿಸಬಹುದಾಗಿದೆ. ದೇಹವನ್ನು ಸೇರಿದ ಕೂಡಲೇ ಈ ಔಷಧವು ವೈರಸ್‌ನಿಂದ ಬಾಧಿತ ದೇಹದ ಕೋಶಗಳನ್ನು ಪತ್ತೆ ಮಾಡಿ, ಮುಂದೆ ವೈರಾಣು ತನ್ನಷ್ಟಕ್ಕೆ ತಾನೆ ಸಂತಾನೋತ್ಪತ್ತಿ ಮಾಡದಂತೆ, ಇತರ ಭಾಗಗಳಿಗೆ ಹಬ್ಬದಂತೆ ರಕ್ಷಾ ಕವಚ ನಿರ್ಮಿಸುತ್ತದೆ. ವೈರಾಣು ಬೆಳವಣಿಗೆಗೆ ಅಗತ್ಯ ಶಕ್ತಿಯು ದೇಹದಿಂದ ಪೂರೈಕೆಯಾಗದಂತೆ ತಡೆಯುತ್ತದೆ. ಸೋಂಕಿತ ಕೋಶಗಳನ್ನೇ ಕೇಂದ್ರೀಕರಿಸುವುದು ಈ ಔಷಧದ ವಿಶೇಷತೆ ಎಂದು ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ತಯಾರಿ ಸುಲಭ
ಈ ಔಷಧವನ್ನು ಕಚ್ಚಾ ಪದಾರ್ಥಗಳಿಗಾಗಿ ವಿದೇಶಗಳ ಮೇಲೆ ಅವಲಂಬನೆಯಾಗದೆ ದೇಶೀಯವಾಗಿಯೇ ಸಾಕಷ್ಟು ಪ್ರಮಾಣದಲ್ಲಿ ತಯಾರಿಸಬಹುದಾಗಿದೆ. ಸಾಮಾನ್ಯ ಸಾಮಾನ್ಯ ಅಣುಗಳು ಮತ್ತು ಗ್ಲೂಕೋಸ್‌ನ ಧಾತುವಿನಿಂದ ಇದನ್ನು ಸಿದ್ಧಪಡಿಸಲಾಗುತ್ತದೆ. ಇದಕ್ಕೆ ಬೇಕಾಗುವ ಕಚ್ಚಾ ಪದಾರ್ಥಗಳು ದೇಶೀಯವಾಗಿಯೇ ಸಾಕಷ್ಟು ಲಭ್ಯವಿವೆ ಎಂದು ಸಂಸ್ಥೆ ತಿಳಿಸಿದೆ.
9 ಲಕ್ಷ ಮಂದಿ ಸೋಂಕಿತರು ಆಕ್ಸಿಜನ್‌ ಮೇಲಿದ್ದಾರೆ
ದೇಶಾದ್ಯಂತ 1,70,841 ಕೋವಿಡ್‌ ರೋಗಿಗಳು ವೆಂಟಿಲೇಟರ್ನಲ್ಲಿದ್ದರೆ, 9,02,291 ಸೋಂಕಿತರು ಆಮ್ಲಜನಕದ ಬೆಂಬಲದಲ್ಲಿದ್ದಾರೆ ಎಂದು ಕೇಂದ್ರ ಆರೋಗ್ಯ ಸಚಿವ ಹರ್ಷವರ್ಧನ್‌ ಅವರು ಶನಿವಾರ ತಿಳಿಸಿದ್ದಾರೆ.
