ಕಲಬುರಗಿಗೆ ಕಾಲಿಟ್ಟ ಮಾರಕ ಬ್ಲ್ಯಾಕ್‌ ಫಂಗಸ್‌ ರೋಗ?; ಪೊಲೀಸ್‌ ಪೇದೆಯಲ್ಲಿ ಸೋಂಕು ಪತ್ತೆ!
ಹೈಲೈಟ್ಸ್‌:
- ಪೊಲೀಸ್‌ ಪೇದೆಯಲ್ಲಿ ಸೋಂಕು ಪತ್ತೆ
- ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ
- ಬ್ಲಾಕ್‌ ಫಂಗಸ್‌ ಕಾಯಿಲೆ ಎಂದು ಶಂಕೆ
ಕಲಬುರಗಿ: ನಗರದ ಶಹಾಬಾದ್‌ ರಸ್ತೆಯ ಬಡಾವಣೆಯೊಂದರ ನಿವಾಸಿ ಮತ್ತು ಪೊಲೀಸ್‌ ಪೇದೆಯೊಬ್ಬರಿಗೆ ಬ್ಲಾಕ್‌ ಫಂಗಸ್‌ (ಮ್ಯೂಕೋರ್ಮೈಕೋಸಿಸ್‌) ಎನ್ನುವ ಶಾಶ್ವತ ಅಂಗಾಂಗ ಊನತೆ ಮಾಡಿ ಸಾವು ತರಬಲ್ಲ ರೋಗ ಪತ್ತೆಯಾಗಿದೆ ಎನ್ನಲಾಗುತ್ತಿದೆ.
ಇದು ಈಗಾಗಲೇ ರಾಜ್ಯದಲ್ಲಿ ಹಾಗೂ ದೇಶದ ಹಲವೆಡೆ ದಾಂಗುಡಿ ಇಟ್ಟಿದ್ದು, ಕೊರೊನಾ ಸೋಂಕಿನಿಂದ ಮುಕ್ತಿ ಪಡೆದು ಪಾರಾಗಿ ಬರುವ ರೋಗಿಗಳಲ್ಲಿಇದು ಕಾಣಿಸಿಕೊಳ್ಳಲಿದೆ ಎನ್ನಲಾಗುತ್ತಿದೆ. ಈ ರೋಗ ಅಂಟಿಕೊಂಡರೆ ಅದು ಕಣ್ಣು, ಮೆದುಳು, ಕಿಡ್ನಿಗಳನ್ನು ನಿಷ್ಕ್ರೀಯ ಮಾಡಿ ಕೊನೆಗೆ ಸಾವಿಗೆ ದೂಡುತ್ತದೆ ಎಂದು ಈಗಾಗಲೇ ತನಿಖೆಗಳಿಂದ ರುಜುವಾತಾಗಿದೆ.
ಕೊರೊನಾ ಗೆದ್ದಿದ್ದರು
ಪೊಲೀಸ್‌ ಪೇದೆ ಮಲ್ಲಪ್ಪ (ಹೆಸರು ಬದಲಿಸಿದೆ) ನಗರದ ಠಾಣೆಯಲ್ಲಿ ಪೇದೆಯಾಗಿ ಕೆಲಸ ಮಾಡುತ್ತಿದ್ದು, ಇವರಿಗೆ ಹಲವು ದಿನಗಳ ಹಿಂದೆ ಕೊರೊನಾ ಪಾಸಿಟಿವ್‌ ಬಂದಿತ್ತು. ಅವರನ್ನು ನಗರದ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಕೊಡಿಸಿದಾಗ ನೆಗೆಟಿವ್‌ ಬಂದಿತ್ತು, ಹಾಗಾಗಿ ಮನೆಗೂ ಬಂದಿದ್ದರು. ಒಂದು ವಾರದ ಬಳಿಕ ಅವರಿಗೆ ಕಣ್ಣಿನ ತೊಂದರೆ ಕಾಣಿಸಿಕೊಂಡಿತು. ಆಗ ಅವರಿಗೆ ನಗರದ ಹೊರ ವಲಯದ ಖಾಸಗಿ ಆಸ್ಪತ್ರೆಯಲ್ಲಿ ದಾಖಲಿಸಲಾಗಿದೆ. ಈಗಾಗಲೇ ಕಣ್ಣು ಹೋಗಿದ್ದು, ಕೈ ಕಾಲು ಸ್ವಾಧೀನ ಕಳೆದುಕೊಂಡಿವೆ. ವೈದ್ಯರು ಆಶಾಭಾವ ಬಿಟ್ಟಿದ್ದಾರೆ ಎಂದು ಕುಟುಂಬದ ಮೂಲಗಳು ತಿಳಿಸಿವೆ. ಪೇದೆ ತಾಯಿಯೂ ಕೊರೊನಾ ಪಾಸಿಟಿವ್‌ ಆಗಿದ್ದು, ಚಿಕಿತ್ಸೆ ಪಡೆಯುತ್ತಿದ್ದಾರೆ.
