ಅತೀ ಕಡಿಮೆ ರೇಟಿಂಗ್ ಪಡೆದ ‘ರಾಧೆ’: ಕಳಪೆ ಚಿತ್ರಗಳ ಸಾಲಿಗೆ ಸೇರಿದ ಸಲ್ಮಾನ್ ಚಿತ್ರ!
ಹೈಲೈಟ್ಸ್‌:
- ‘ರಾಧೆ’ ಚಿತ್ರಕ್ಕೆ ಅತೀ ಕಡಿಮೆ ರೇಟಿಂಗ್ ಲಭ್ಯವಾಗಿದೆ
- ಐಎಂಡಿಬಿಯಲ್ಲಿ ‘ರಾಧೆ’ ಚಿತ್ರಕ್ಕೆ ಕೇವಲ ‘2’ ರೇಟಿಂಗ್ ನೀಡಲಾಗಿದೆ
- ಸಲ್ಮಾನ್ ಖಾನ್ ವೃತ್ತಿ ಜೀವನದಲ್ಲಿ ಅತೀ ಕಡಿಮೆ ರೇಟಿಂಗ್ ಪಡೆದ ಎರಡನೇ ಚಿತ್ರ ‘ರಾಧೆ’
ಬಾಲಿವುಡ್ ಬಾಕ್ಸ್‌ಆಫೀಸ್ ಸುಲ್ತಾನ್ ಸಲ್ಮಾನ್ ಖಾನ್ ಅಭಿನಯದ ‘ರಾಧೆ‘ ಸಿನಿಮಾ ಬಿಡುಗಡೆಯಾಗಿದೆ. ರಂಜಾನ್ ಹಬ್ಬದ ಸಂದರ್ಭದಲ್ಲಿ ತಮ್ಮ ಅಭಿಮಾನಿಗಳಿಗೆ ಉಡುಗೊರೆಯಾಗಿ ‘ರಾಧೆ’ ಚಿತ್ರವನ್ನು ಕೊಟ್ಟಿದ್ದಾರೆ ಸಲ್ಮಾನ್ ಖಾನ್. ಕೋವಿಡ್‌ನಿಂದಾಗಿ ಭಾರತದಲ್ಲಿ ಒಟಿಟಿ ಪ್ಲಾಟ್‌ಫಾರ್ಮ್‌ನಲ್ಲಿ ‘ರಾಧೆ’ ರಿಲೀಸ್ ಆಗಿದ್ದರೆ, ವಿದೇಶಗಳಲ್ಲಿ ಚಿತ್ರಮಂದಿರಗಳಲ್ಲೇ ತೆರೆಗೆ ಬಂದಿದೆ.
ಪ್ರಭುದೇವ ನಿರ್ದೇಶನದ ಸಲ್ಮಾನ್ ಖಾನ್ ಅಭಿನಯದ ‘ರಾಧೆ: ಯುವರ್ ಮೋಸ್ಟ್ ವಾಂಟೆಡ್ ಭಾಯ್’ ಚಿತ್ರದ ಬಗ್ಗೆ ಪ್ರೇಕ್ಷಕರಿಗೆ ಹಾಗೂ ಅಭಿಮಾನಿಗಳಿಗೆ ಭಾರೀ ನಿರೀಕ್ಷೆ ಇತ್ತು. ಆದರೆ, ಎಲ್ಲರ ನಿರೀಕ್ಷೆ ಮಟ್ಟ ತಲುಪುವಲ್ಲಿ ‘ರಾಧೆ’ ತಂಡ ವಿಫಲವಾಗಿದೆ. ಸಲ್ಮಾನ್ ಖಾನ್ ಅವರ ಅಪ್ಪಟ ಅಭಿಮಾನಿಗಳಿಗೂ ‘ರಾಧೆ’ ಚಿತ್ರ ಅಷ್ಟು ರುಚಿಸಿಲ್ಲ. ಪರಿಣಾಮ, ಐಎಂಡಿಬಿ ರೇಟಿಂಗ್‌ನಲ್ಲಿ ‘ರಾಧೆ’ ಚಿತ್ರಕ್ಕೆ ಅತೀ ಕಡಿಮೆ ರೇಟಿಂಗ್ ಲಭ್ಯವಾಗಿದೆ.
ಜೀ ಪ್ಲಾಟ್‌ಫಾರ್ಮ್‌ನಲ್ಲಿ ‘ರಾಧೆ’ ಸಿನಿಮಾ ರಿಲೀಸ್ ಆಗಿತ್ತು. ‘ರಾಧೆ’ ಚಿತ್ರವನ್ನು ವೀಕ್ಷಿಸಲು ಅಭಿಮಾನಿಗಳು ಮುಗಿಬಿದ್ದಿದ್ರಿಂದ ಮೊದಲ ದಿನ ಜೀ ಸರ್ವರ್ ಕ್ರ್ಯಾಶ್ ಆಗಿತ್ತು. ಆದರೆ, ‘ರಾಧೆ’ ಚಿತ್ರ ವೀಕ್ಷಿಸಿದ ಬಳಿಕ ಪ್ರೇಕ್ಷಕರು ಕಡಿಮೆ ರೇಟಿಂಗ್ ನೀಡಿದ್ದಾರೆ.
41 ಸಾವಿರಕ್ಕೂ ಅಧಿಕ ಪ್ರೇಕ್ಷಕರ ವಿಮರ್ಶೆಗಳ ಆಧಾರದ ಮೇಲೆ ಐಎಂಡಿಬಿಯಲ್ಲಿ ‘ರಾಧೆ’ ಚಿತ್ರಕ್ಕೆ ಕೇವಲ ‘2’ ರೇಟಿಂಗ್ ನೀಡಲಾಗಿದೆ. ಆ ಮೂಲಕ ಸಲ್ಮಾನ್ ಖಾನ್ ವೃತ್ತಿ ಜೀವನದಲ್ಲಿ ಅತೀ ಕಡಿಮೆ ರೇಟಿಂಗ್ ಪಡೆದ ಎರಡನೇ ಚಿತ್ರ ‘ರಾಧೆ’ ಎನಿಸಿಕೊಂಡಿದೆ. 1.9 ರೇಟಿಂಗ್ ಮೂಲಕ ಸಲ್ಮಾನ್ ಖಾನ್ ವೃತ್ತಿ ಜೀವನದಲ್ಲೇ ಅತಿ ಕಡಿಮೆ ರೇಟಿಂಗ್ ಪಡೆದಿರುವ ಚಿತ್ರ ಎಂಬ ಕುಖ್ಯಾತಿ ಪಡೆದಿರುವುದು ‘ರೇಸ್ 3’. 2018ರಲ್ಲಿ ‘ರೇಸ್ 3’ ಬಿಡುಗಡೆಯಾಗಿತ್ತು.
‘ರಾಧೆ’ ಚಿತ್ರ ಪ್ರೇಕ್ಷಕರಿಗೆ ರುಚಿಸದ ಹಿನ್ನೆಲೆಯಲ್ಲಿ ಸೋಷಿಯಲ್ ಮೀಡಿಯಾದಲ್ಲಿ ಹಲವು ಮೀಮ್ಸ್ ಹರಿದಾಡುತ್ತಿದೆ. ಮೀಮ್ಸ್ ಹಾಗೂ ಜೋಕ್ಸ್‌ನಿಂದ ‘ರಾಧೆ’ ಚಿತ್ರವನ್ನು ನೆಟ್ಟಿಗರು ಟ್ರೋಲ್ ಮಾಡುತ್ತಿದ್ದಾರೆ.
ಅಂದ್ಹಾಗೆ, ಅಂಡರ್‌ಕವರ್ ಪೊಲೀಸ್ ಆಫೀಸರ್ ಆಗಿ ಸಲ್ಮಾನ್ ಖಾನ್ ಅಭಿನಯದ ಚಿತ್ರ ‘ರಾಧೆ’. ಪ್ರಭುದೇವ ನಿರ್ದೇಶನ ಮಾಡಿರುವ ಈ ಚಿತ್ರದಲ್ಲಿ ದಿಶಾ ಪಟಾನಿ, ರಣ್‌ದೀಪ್ ಹೂಡಾ, ಜ್ಯಾಕಿ ಶ್ರಾಫ್, ಗೌತಮ್ ಗುಲಾಟಿ ಮುಂತಾದವರು ಅಭಿನಯಿಸಿದ್ದಾರೆ.
