ಸಲ್ಮಾನ್ ವೃತ್ತಿ ಬದುಕಿನ ಅತ್ಯಂತ ಕಳಪೆ ಚಿತ್ರ ಎಂದೆನಿಸಿಕೊಂಡ ‘ರಾಧೆ’
ಹೈಲೈಟ್ಸ್‌:
- ‘ರಾಧೆ’ ಚಿತ್ರಕ್ಕೆ ಅತೀ ಕಡಿಮೆ ರೇಟಿಂಗ್ ಸಿಕ್ಕಿದೆ
- ಐಎಂಡಿಬಿಯಲ್ಲಿ ‘ರಾಧೆ’ ಚಿತ್ರಕ್ಕೆ ಕೇವಲ 1.8 ರೇಟಿಂಗ್ ನೀಡಲಾಗಿದೆ
- ಸಲ್ಮಾನ್ ಖಾನ್ ವೃತ್ತಿ ಜೀವನದಲ್ಲಿ ಅತೀ ಕಡಿಮೆ ರೇಟಿಂಗ್ ಪಡೆದ ಚಿತ್ರ ‘ರಾಧೆ’
ರಂಜಾನ್ ಹಬ್ಬದ ಸಂದರ್ಭದಲ್ಲಿ ಅಭಿಮಾನಿಗಳಿಗೆ ಉಡುಗೊರೆಯಾಗಿ ರಿಲೀಸ್ ಆದ ಸಿನಿಮಾ ‘ರಾಧೆ‘. ಕೋವಿಡ್ ಲಾಕ್‌ಡೌನ್‌ನಿಂದಾಗಿ ಭಾರತದಲ್ಲಿ ಒಟಿಟಿ ಪ್ಲಾಟ್‌ಫಾರ್ಮ್‌ನಲ್ಲಿ ‘ರಾಧೆ’ ಬಿಡುಗಡೆಯಾಗಿದೆ. ವಿದೇಶಗಳಲ್ಲಿ ಚಿತ್ರಮಂದಿರಗಳಲ್ಲೇ ‘ರಾಧೆ’ ತೆರೆಗೆ ಬಂದಿದೆ.
ಪ್ರಭುದೇವ ನಿರ್ದೇಶನದ ಸಲ್ಮಾನ್ ಖಾನ್ ಅಭಿನಯ ಇರುವ ಚಿತ್ರ ‘ರಾಧೆ’. ಹೀಗಾಗಿ ಬಹುನಿರೀಕ್ಷೆಯೊಂದಿಗೆ ‘ರಾಧೆ’ ತೆರೆಗೆ ಬಂತು. ಆದರೆ, ಚಿತ್ರ ನೋಡಿದ ಬಳಿಕ ಪ್ರೇಕ್ಷಕರಿಗೆ ಸಿನಿಮಾ ಅಷ್ಟೊಂದು ರುಚಿಸಿಲ್ಲ. ಸಲ್ಮಾನ್ ಖಾನ್ ಅಪ್ಪಟ ಅಭಿಮಾನಿಗಳಿಗೂ ‘ರಾಧೆ’ ಕಿಕ್ ನೀಡಿಲ್ಲ. ಪರಿಣಾಮ, ಐಎಂಡಿಬಿ ರೇಟಿಂಗ್‌ನಲ್ಲಿ ‘ರಾಧೆ’ ಚಿತ್ರಕ್ಕೆ ಅತ್ಯಂತ ಕಡಿಮೆ ರೇಟಿಂಗ್ ಲಭ್ಯವಾಗಿದೆ.
ಸದ್ಯ ಐಎಂಡಿಬಿ ರೇಟಿಂಗ್ ಪ್ರಕಾರ, ‘ರಾಧೆ’ ಚಿತ್ರಕ್ಕೆ 10ಕ್ಕೆ 1.8 ರೇಟಿಂಗ್ ಲಭ್ಯವಾಗಿದೆ. ಆ ಮೂಲಕ ಸಲ್ಮಾನ್ ಖಾನ್ ವೃತ್ತಿಬದುಕಿನಲ್ಲಿ ಅತ್ಯಂತ ಕಡಿಮೆ ರೇಟಿಂಗ್ ಪಡೆದ ಚಿತ್ರ ‘ರಾಧೆ’ ಎಂದೆನಿಸಿಕೊಂಡಿದೆ. 1.9 ರೇಟಿಂಗ್ ಮೂಲಕ ಎರಡನೇ ಅತಿ ಕಡಿಮೆ ರೇಟಿಂಗ್ ಪಡೆದಿರುವ ಸಲ್ಮಾನ್ ಖಾನ್ ಚಿತ್ರ ‘ರೇಸ್‌ 3’ ಎನಿಸಿಕೊಂಡಿದೆ.
ಕುಸಿಯುತ್ತಿದೆ ‘ರಾಧೆ’ ರೇಟಿಂಗ್
ಮೊದಲು ‘ರಾಧೆ’ ಚಿತ್ರಕ್ಕೆ 10ಕ್ಕೆ 2.1 ರೇಟಿಂಗ್ ಲಭ್ಯವಾಗಿತ್ತು. ‘ರಾಧೆ’ ಚಿತ್ರಕ್ಕೆ ಕಡಿಮೆ ರೇಟಿಂಗ್ ಕೊಟ್ಟ ಪ್ರೇಕ್ಷಕರ ಸಂಖ್ಯೆ ಜಾಸ್ತಿಯಾಗುತ್ತಿದ್ದ ಹಾಗೆ ರೇಟಿಂಗ್ 2ಕ್ಕೆ ಕುಸಿಯಿತು. ಇದೀಗ 66 ಸಾವಿರಕ್ಕೂ ಹೆಚ್ಚು ವಿಮರ್ಶೆಗಳ ಆಧಾರದ ಮೇಲೆ ರೇಟಿಂಗ್ ಮತ್ತಷ್ಟು ಕುಸಿದಿದ್ದು 1.8ಕ್ಕೆ ಬಂದು ನಿಂತಿದೆ. ‘ರಾಧೆ’ ರೇಟಿಂಗ್ ಇನ್ನಷ್ಟು ಕುಸಿಯುವ ಸಾಧ್ಯತೆ ಇದೆ.
ಅತಿ ಹೆಚ್ಚು ವೀಕ್ಷಣೆ ಪಡೆದ ಚಿತ್ರ
‘ರಾಧೆ’ ಚಿತ್ರ ಜೀ ಪ್ಲಾಟ್‌ಫಾರ್ಮ್‌ನಲ್ಲಿ ಪೇ-ಪರ್-ವ್ಯೂ ಮೂಲಕ ಬಿಡುಗಡೆಯಾಗಿತ್ತು. ರಿಲೀಸ್ ಆದ ಮೊದಲ ದಿನ ‘ರಾಧೆ’ ಸಿನಿಮಾ 4.2 ಮಿಲಿಯನ್ ವ್ಯೂಸ್ ಪಡೆದುಕೊಂಡಿದೆ. ಹೀಗಾಗಿ, ಆನ್‌ಲೈನ್‌ನಲ್ಲಿ ಅತಿ ಹೆಚ್ಚು ವೀಕ್ಷಣೆ ಪಡೆದ ಮೂರನೇ ಚಿತ್ರ ‘ರಾಧೆ’ ಎನಿಸಿಕೊಂಡಿದೆ. ಮೊದಲೆರಡು ಸ್ಥಾನಗಳಲ್ಲಿ ‘ದಿಲ್ ಬೇಚಾರಾ’ ಹಾಗೂ ‘ಲಕ್ಷ್ಮೀ’ ಚಿತ್ರಗಳಿವೆ.
ಅಂದ್ಹಾಗೆ, ಅಂಡರ್‌ಕವರ್ ಪೊಲೀಸ್ ಆಫೀಸರ್ ಆಗಿ ಸಲ್ಮಾನ್ ಖಾನ್ ಅಭಿನಯದ ಚಿತ್ರ ‘ರಾಧೆ’. ಪ್ರಭುದೇವ ನಿರ್ದೇಶನ ಮಾಡಿರುವ ಈ ಚಿತ್ರದಲ್ಲಿ ದಿಶಾ ಪಟಾನಿ, ರಣ್‌ದೀಪ್ ಹೂಡಾ, ಜ್ಯಾಕಿ ಶ್ರಾಫ್, ಗೌತಮ್ ಗುಲಾಟಿ ಮುಂತಾದವರು ಅಭಿನಯಿಸಿದ್ದಾರೆ.
