ಸೋನು ಸೂದ್ ಹೆಸರಿನಲ್ಲಿ ನಡೆಯುತ್ತಿದೆ ವಂಚನೆ: ಅಪ್ಪಿತಪ್ಪಿಯೂ ಇಂತಹ ಜಾಲಕ್ಕೆ ಸಿಲುಕಬೇಡಿ!
ಹೈಲೈಟ್ಸ್‌:
- ಬಾಲಿವುಡ್ ನಟ ಸೋನು ಸೂದ್ ಹೆಸರಿನಲ್ಲಿ ವಂಚನೆ
- ಸೋನು ಸೂದ್ ಹೆಸರಿನಲ್ಲಿ ಹಣ ಗಳಿಸಲು ಮುಂದಾದ ಕಿಡಿಗೇಡಿಗಳು
- ವಂಚನೆಯ ಜಾಲಕ್ಕೆ ಸಿಲುಕಬೇಡಿ ಎಂದ ಸೋನು ಸೂದ್
ಮಾರಣಾಂತಿಕ ಕೋವಿಡ್-19 ನಿಂದ ಉಂಟಾಗಿರುವ ಸಂಕಷ್ಟದ ಸಮಯದಲ್ಲಿ ಬಾಲಿವುಡ್ ನಟ ಸೋನು ಸೂದ್ ಹಲವರಿಗೆ ಸಹಾಯ ಮಾಡುತ್ತಿದ್ದಾರೆ. ಆಸ್ಪತ್ರೆಗಳಲ್ಲಿ ಚಿಕಿತ್ಸೆಗೆ ಬೆಡ್ ಸಿಗದೆ ಒದ್ದಾಡುತ್ತಿರುವ ಸೋಂಕಿತರಿಗೆ ಬೆಡ್ ವ್ಯವಸ್ಥೆ ಮಾಡುವುದರಿಂದ ಹಿಡಿದು, ಆಕ್ಸಿಜನ್ ಪೂರಕೆ ಹಾಗೂ ಔಷಧಿಗಳನ್ನು ತಲುಪಿಸುವವರೆಗೂ ಸೋನು ಸೂದ್ ಅನೇಕರಿಗೆ ಸಹಾಯ ಹಸ್ತ ಚಾಚಿದ್ದಾರೆ.
ಸಹಾಯಕ್ಕಾಗಿ ಯಾರೇ ಕೋರಿದರೂ, ತಮ್ಮ ಸೂದ್ ಫೌಂಡೇಶನ್ ಮೂಲಕ ಉಚಿತವಾಗಿ ಸೇವೆ ಮಾಡುತ್ತಿದ್ದಾರೆ ಸೋನು ಸೂದ್. ಹೀಗಿದ್ದರೂ, ಸೋನು ಸೂದ್ ಹೆಸರಿಗೆ ಕಳಂಕ ತರುವ ಕೆಲಸ ನಡೆಯುತ್ತಿದೆ. ಸೋನು ಸೂದ್ ಹೆಸರಿನಲ್ಲಿ ಕೆಲ ಕಿಡಿಗೇಡಿಗಳು ವಂಚನೆ ಮಾಡುತ್ತಿದ್ದಾರೆ.
ಸೋನು ಸೂದ್ ಹೆಸರಿನಲ್ಲಿ ಹಣ ಕಬಳಿಸಲು ಕಿಡಿಗೇಡಿಗಳು ಪ್ಲಾನ್ ಮಾಡಿದ್ದಾರೆ. ಆ ಕಿಡಿಗೇಡಿಗಳ ಜಾಲವನ್ನು ಸ್ವತಃ ಸೋನು ಸೂದ್ ಬಯಲು ಮಾಡಿದ್ದಾರೆ. ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿರುವ ಪೋಸ್ಟ್ ಅನ್ನು ಟ್ವೀಟ್ ಮಾಡಿ, ಅದನ್ನು ‘ಫೇಕ್’ ಎನ್ನುವ ಮೂಲಕ ಸೋನು ಸೂದ್ ಎಚ್ಚರಿಕೆಯ ಕರೆಗಂಟೆ ಮೊಳಗಿಸಿದ್ದಾರೆ.
ವೈರಲ್ ಆಗಿದ್ದ ಫೇಕ್ ಪೋಸ್ಟ್‌ನಲ್ಲಿ ಏನಿತ್ತು?
”ಮಹಾಮಾರಿ ಕೋವಿಡ್-19 ವಿರುದ್ಧ ಹೋರಾಡಲು ಒಬ್ಬರಿಗೊಬ್ಬರು ಸಹಾಯ ಮಾಡಬೇಕಾದ ಅವಶ್ಯಕತೆ ಇದೆ. ಸೋನು ಸೂದ್ ಫೌಂಡೇಶನ್ ತಂಡಕ್ಕೆ ನೀವು ದೇಣಿಗೆ ನೀಡಲು ಬಯಸಿದರೆ 1 ರೂಪಾಯಿಯಿಂದ ಹಿಡಿದು ನಿಮ್ಮ ಕೈಯಲ್ಲಿ ಎಷ್ಟು ಸಾಧ್ಯವೋ, ಅಷ್ಟನ್ನು ದಾನ ಮಾಡಿ” ಎಂದು ಆನ್‌ಲೈನ್ ಟ್ರಾನ್ಸ್‌ಫರ್‌ಗಾಗಿ ಫೋನ್ ನಂಬರ್‌ವೊಂದನ್ನು ಹಾಕಲಾಗಿದೆ.
ಈ ಪೋಸ್ಟ್ ಫೇಕ್ ಎಂದು ಸೋನು ಸೂದ್ ಟ್ವೀಟ್ ಮಾಡಿದ್ದಾರೆ. ಇಂತಹ ಫೇಕ್ ಪೋಸ್ಟ್‌ಗಳಿಗೆ ಮರುಳಾಗಿ ದುಡ್ಡು ಕಳೆದುಕೊಳ್ಳಬೇಡಿ ಎಂದು ನಟ ಸೋನು ಸೂದ್ ಎಲ್ಲರಿಗೂ ವಾರ್ನಿಂಗ್ ಕೊಟ್ಟಿದ್ದಾರೆ.
