ದಿಲ್ಲಿಯಲ್ಲೂ ಕಂಪನ ಹುಟ್ಟುಹಾಕಿದ ಸಿಎಂ ಹೇಳಿಕೆ, ಬಿಎಸ್‌ವೈ ವಿರುದ್ಧ ಹೇಳಿಕೆ ನೀಡದಿರಲು ಹೈಕಮಾಂಡ್‌ ಸೂಚನೆ
ಹೈಲೈಟ್ಸ್‌:
- ಹೈಕಮಾಂಡ್‌ ಸೂಚಿಸಿದರೆ ರಾಜೀನಾಮೆಗೆ ಸಿದ್ಧ ಎಂಬ ಸಿಎಂ ಬಿಎಸ್ ಯಡಿಯೂರಪ್ಪ ಹೇಳಿಕೆಯಿಂದ ದಿಲ್ಲಿಯಲ್ಲೂ ಕಂಪನ
- ಈ ಬೆಳವಣಿಗೆ ಬೆನ್ನಲ್ಲೇ ಯಾವುದೇ ಸಚಿವರು ಹಾಗೂ ಶಾಸಕರು ನಾಯಕತ್ವದ ವಿರುದ್ಧ ಹೇಳಿಕೆ ನೀಡದಂತೆ ವರಿಷ್ಠರಿಂದ ಸಂದೇಶ ರವಾನೆ
- ಸಿಎಂ ಬಿಎಸ್‌ವೈ ಭಾನುವಾರ ಬೆಳಗ್ಗೆ ಸ್ಫೋಟಕ ಹೇಳಿಕೆ ನೀಡುತ್ತಿದ್ದಂತೆ ರಾಜ್ಯ ರಾಜಕಾರಣದಲ್ಲಿ ಸಂಚಲನ ಸೃಷ್ಟಿಯಾಗಿತ್ತು
- ಇದರ ಬೆನ್ನಿಗೇ ಸಚಿವರು, ಶಾಸಕರು ಬಿಎಸ್ ಯಡಿಯೂರಪ್ಪ ಪರ ಹೇಳಿಕೆ ನೀಡಿದ್ದರು
ಬೆಂಗಳೂರು: ಹೈಕಮಾಂಡ್‌ ಸೂಚಿಸಿದರೆ ರಾಜೀನಾಮೆಗೆ ಸಿದ್ಧ ಎಂಬ ಸಿಎಂ ಯಡಿಯೂರಪ್ಪ ಹೇಳಿಕೆಯಿಂದ ದಿಲ್ಲಿಯಲ್ಲೂ ಕಂಪನವಾಗಿದೆ. ಈ ಬೆಳವಣಿಗೆ ಹಿನ್ನೆಲೆಯಲ್ಲಿ ಅತ್ಯಂತ ಜಾಗರೂಕತೆಯಿಂದ ಪರಿಸ್ಥಿತಿ ನಿಭಾಯಿಸಲು ಮುಂದಾಗಿರುವ ಬಿಜೆಪಿ ವರಿಷ್ಠರು, ಯಾವುದೇ ಸಚಿವರು ಹಾಗೂ ಶಾಸಕರು ನಾಯಕತ್ವದ ವಿರುದ್ಧ ಹೇಳಿಕೆ ನೀಡದಂತೆ ಸಂದೇಶ ರವಾನಿಸಿದ್ದಾರೆ.
ಸಿಎಂ ಬಿಎಸ್‌ವೈ ಭಾನುವಾರ ಬೆಳಗ್ಗೆ ಸ್ಫೋಟಕ ಹೇಳಿಕೆ ನೀಡುತ್ತಿದ್ದಂತೆ ರಾಜ್ಯ ರಾಜಕಾರಣದಲ್ಲಿ ಸಂಚಲನ ಸೃಷ್ಟಿಯಾಗಿತ್ತು. ಇದರ ಬೆನ್ನಿಗೇ ಸಚಿವರು, ಶಾಸಕರು ಬಿಎಸ್ ಯಡಿಯೂರಪ್ಪ ಪರ ಹೇಳಿಕೆ ನೀಡಿದ್ದರು. ಈ ಟ್ರೆಂಡ್‌ ಗಮನಿಸಿದ ಹೈಕಮಾಂಡ್‌ಗೂ ಬಿಎಸ್‌ವೈ ಶಕ್ತಿಯ ಬಗ್ಗೆ ಮತ್ತೊಮ್ಮೆ ಅರಿವಾಗಿದೆ. ಹಾಗಾಗಿ ಬಿಜೆಪಿ ವರಿಷ್ಠ ಮಂಡಳಿಯ ಪ್ರಮುಖರು ಕರ್ನಾಟಕದ ವಿದ್ಯಮಾನದ ಪೂರ್ಣ ಮಾಹಿತಿ ಪಡೆದುಕೊಂಡಿದ್ದಾರೆ. ಇದರ ಸಾಧಕ, ಬಾಧಕದ ಬಗ್ಗೆ ಚರ್ಚಿಸಿದ್ದಾರೆ.
ಆ ಬಳಿಕ ರಾಜ್ಯ ಬಿಜೆಪಿಗೆ ಹೈಕಮಾಂಡ್‌ ಕಡೆಯಿಂದ ಸಂದೇಶ ಬಂದಿದೆ. ಕೋವಿಡ್‌ ನಿರ್ವಹಣೆಗೆ ಆದ್ಯತೆ ನೀಡಬೇಕು. ಇಂತಹ ಸಂದರ್ಭದಲ್ಲಿ ಭಿನ್ನಮತ ಚಟುವಟಿಕೆ ಬೇಡ. ಎಲ್ಲವನ್ನೂ ಗಮನಿಸಲಾಗುತ್ತಿದೆ. ಏನೇ ಸಮಸ್ಯೆಯಿದ್ದರೂ ಇತ್ಯರ್ಥಪಡಿಸಲಾಗುವುದು. ಯಡಿಯೂರಪ್ಪ ವಿರುದ್ಧ ಯಾರೂ ಹೇಳಿಕೆ ನೀಡಕೂಡದು ಎಂದು ಸೂಚಿಸಲಾಗಿದೆ.
ಹೈಕಮಾಂಡ್‌ನಿಂದ ಇಂತಹ ನಿರ್ದೇಶನ ಬರುತ್ತಿದ್ದಂತೆ ರಾಜ್ಯ ಬಿಜೆಪಿ ಅಧ್ಯಕ್ಷ ನಳಿನ್‌ ಕುಮಾರ್‌ ಕಟೀಲ್‌ ಪಕ್ಷದ ಶಾಸಕರಿಗೆ ಈ ಬಗ್ಗೆ ಸೂಚನೆ ನೀಡಿದ್ದಾರೆ. ಸರಕಾರ ಹಾಗೂ ಪಕ್ಷದ ವರ್ಚಸ್ಸಿಗೆ ಧಕ್ಕೆ ತರುವ ಹೇಳಿಕೆ ನೀಡಿದರೆ ಶಿಸ್ತು ಕ್ರಮ ಜರುಗಿಸುವ ಎಚ್ಚರಿಕೆಯನ್ನೂ ನೀಡಲಾಗಿದೆ. ಜತೆಗೆ ಮುಖ್ಯಮಂತ್ರಿಯವರೂ ”ಸಹಿ ಸಂಗ್ರಹಕ್ಕೆ ಯಾರೂ ಮುಂದಾಗಬಾರದು. ಕ್ಷೇತ್ರದಲ್ಲಿ ಮೊಕ್ಕಾಂ ಹೂಡಿ ಕೋವಿಡ್‌ ನಿರ್ವಹಣೆ ಕೈಗೊಳ್ಳಬೇಕು. ಜನರಿಗೆ ಅಗತ್ಯ ನೆರವು ಒದಗಿಸಬೇಕು,” ಎಂಬ ಸೂಚನೆ ನೀಡಿದ್ದಾರೆ.
ಬದಲಾದ ವರಸೆ
ಸಿಎಂ ಹುದ್ದೆಯ ಮೇಲೆ ಕಣ್ಣಿಟ್ಟಿರುವ ಕೆಲವು ಸಚಿವರು ಈಗಾಗಲೇ ಕೋಟು ಹೊಲಿಸಿಕೊಂಡಿದ್ದಾರೆ. ದಿಲ್ಲಿ ಮಟ್ಟದಲ್ಲಿ ಪ್ರಭಾವಿ ಆಗಿರುವವರಿಗೂ ಈ ಆಕಾಂಕ್ಷೆಯಿದೆ ಎಂಬ ಸುದ್ದಿಯಾಗಿತ್ತು. ಇಂತಹ ಬಯಕೆ ಉಳ್ಳವರು ನಾಯಕತ್ವದ ಸಂಬಂಧದಲ್ಲಿ ಗೊಂದಲ ಉಂಟಾದಾಗ ಅಡ್ಡಗೋಡೆಯ ಮೇಲೆ ದೀಪವಿಟ್ಟಂತೆ ಮಾತನಾಡುತ್ತಿದ್ದರು. ಅಂಥವರು ಕೂಡ ಈ ಬಾರಿ ಬಿಎಸ್‌ವೈ ಅವರೇ ಪಕ್ಷದ ಸರ್ವಸಮ್ಮತ ನಾಯಕ ಎಂದು ಘೋಷಿಸುತ್ತಿದ್ದಾರೆ. ಹೀಗೆ ವರಸೆ ಬದಲಾದದ್ದರ ಹಿಂದೆ ಹೈಕಮಾಂಡ್‌ ಸೂಚನೆ ಕೆಲಸ ಮಾಡಿದೆ ಎಂಬ ವರ್ತಮಾನವಿದೆ.
ಸಿಎಂ ನಿರೀಕ್ಷೆಯೇನು?
ಯಡಿಯೂರಪ್ಪ ಹೈಕಮಾಂಡ್‌ನಿಂದ ಸ್ಪಷ್ಟ ಸೂಚನೆ ಬಯಸಿದ್ದಾರೆ. ಅಂದರೆ ನಾಯಕತ್ವ ಬದಲಾವಣೆ ಪ್ರಶ್ನೆಯಿಲ್ಲ ಎಂದು ವರಿಷ್ಠರು ಬಹಿರಂಗವಾಗಿ ಸಂದೇಶ ನೀಡಬೇಕು ಎನ್ನುವುದು ಸಿಎಂ ಅಪೇಕ್ಷೆ. ಹಾಗಾಗಿ ತಮ್ಮನ್ನು ಸೋಮವಾರ ಭೇಟಿಯಾಗಿದ್ದ ಸಚಿವರು, ಶಾಸಕರಿಗೂ ಸಿಎಂ, ವರಿಷ್ಠರ ಸೂಚನೆ ಪಾಲಿಸುವುದಾಗಿ ಹೇಳಿದ್ದಾರೆ ಎನ್ನಲಾಗಿದೆ. ಹಾಗಾಗಿ ಯಡಿಯೂರಪ್ಪ ಅವರನ್ನು ಮುಂದುವರಿಸುವ ವಿಚಾರದಲ್ಲಿ ಹೈಕಮಾಂಡ್‌ ಖಚಿತ ನಿರ್ಧಾರ ತೆಗೆದುಕೊಳ್ಳಬೇಕು ಎಂಬ ಒತ್ತಡ ಇನ್ನಷ್ಟು ಹೆಚ್ಚಲಿದೆ.
ಚಟುವಟಿಕೆಯಲ್ಲಿಸಿಎಂ
ಆಡಳಿತಾತ್ಮಕ ಚಟುವಟಿಕೆಯಲ್ಲಿಸಿಎಂ ಬಿಎಸ್‌ವೈ ಸೋಮವಾರವೂ ಸಕ್ರಿಯವಾಗಿ ಭಾಗಿಯಾದರು. ಅಧಿಕೃತ ಕಾರ್ಯಕ್ರಮಗಳಲ್ಲಿ ಪಾಲ್ಗೊಂಡರು. ಕೋವಿಡ್‌ ಸ್ಥಿತಿಗತಿ ಬಗ್ಗೆ ಅಧಿಕಾರಿಗಳಿಂದ ಮಾಹಿತಿ ಪಡೆದರು. ಡಿಸಿಎಂ ಅಶ್ವತ್ಥನಾರಾಯಣ ನೇತೃತ್ವದ ಕೋವಿಡ್‌ ಟಾಸ್ಕ್‌ಫೋರ್ಸ್‌ ಸಭೆ ಹಿನ್ನೆಲೆಯಲ್ಲಿ ಸಲಹೆ ನೀಡಿದರು.
ಸಮಾಜ ಕಲ್ಯಾಣ ಸಚಿವ ಬಿ. ಶ್ರೀರಾಮುಲು ಸಿಎಂರನ್ನು ಭೇಟಿಯಾಗಿ ಚರ್ಚಿಸಿದರು. ಉಳಿದಂತೆ ಡಿಸಿಎಂ ಅಶ್ವತ್ಥನಾರಾಯಣ, ಸಚಿವರಾದ ವಿ. ಸೋಮಣ್ಣ, ಅರವಿಂದ ಲಿಂಬಾವಳಿ, ಡಾ. ಸುಧಾಕರ್‌, ಗೋಪಾಲಯ್ಯ ಮತ್ತಿತರರು ಸಿಎಂ ಗೃಹ ಕಚೇರಿಯಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿದ್ದರು. ರೇಣುಕಾಚಾರ್ಯ ಸೇರಿದಂತೆ ಹಲವು ಶಾಸಕರು ಭೇಟಿ ಕೊಟ್ಟರು.
