ಗ್ರಾಪಂ ಸದಸ್ಯರು ಕುಡಿದು ಸಭೆಗೆ ಬರ್ತಾರೆ; ಗದಗದಲ್ಲಿ ಅಲ್ಕೋಹಾಲ್‌ ಬ್ರೀತ್‌ ಟೆಸ್ಟ್‌ ಮೆಷಿನ್‌ ಅಳವಡಿಕೆಗೆ ಒತ್ತಾಯ
ಹೈಲೈಟ್ಸ್‌:
- ಗ್ರಾಮ ಪಂಚಾಯತ್ ಸದಸ್ಯರು ಕುಡಿದು ಸಭೆಗೆ ಬರುವ ಆರೋಪ
- ಅಲ್ಕೋಹಾಲ್‌ ಬ್ರೀತ್‌ ಟೆಸ್ಟ್‌ ಮಶೀನ್‌ ಅಳವಡಿಕೆಗೆ ಒತ್ತಾಯ
- ಲಕ್ಕುಂಡಿ ಗ್ರಾಮದ ನಿವಾಸಿಗಳು, ಸಾಮಾಜಿಕ ಕಾರ್ಯಕರ್ತರಿಂದ ಮನವಿ
ಗದಗ: ಗ್ರಾಪಂ ಕೆಲ ಸದಸ್ಯರು ಮತ್ತು ಸಿಬ್ಬಂದಿ ಕುಡಿದ ಮತ್ತಿನಲ್ಲಿ ಸಭೆಗೆ ಹಾಜರಾಗುತ್ತಾರೆ. ಇದನ್ನು ತಡೆಯಲು ಗ್ರಾಪಂನಲ್ಲಿ ಅಲ್ಕೋಹಾಲ್‌ ಬ್ರೀತ್‌ ಟೆಸ್ಟರ್‌ ಅಳವಡಿಸಬೇಕು ಎನ್ನುವ ಮನವಿ ಗದಗ ಜಿಪಂ ಸಿಇಒ ಕಚೇರಿಗೆ ತಲುಪಿಸಿದ್ದು, ಸಾಕಷ್ಟು ಚರ್ಚೆಗೆ ಕಾರಣವಾಗಿದೆ.
ಜಿಲ್ಲೆಯ ಐತಿಹಾಸಿಕ ಲಕ್ಕುಂಡಿ ಗ್ರಾಮದ ನಿವಾಸಿಗಳು, ಸಾಮಾಜಿಕ ಕಾರ್ಯಕರ್ತರೊಬ್ಬರು ಸಲ್ಲಿಸಿದ ಮನವಿಯ ಒಟ್ಟು ಸಾರಾಂಶ ಹೀಗಿದೆ:
ಗ್ರಾಪಂ ಸಭೆಯಲ್ಲಿ ಮಹತ್ವದ ವಿಷಯಗಳ ಚರ್ಚೆ, ಠರಾವು ಮತ್ತು ನಿರ್ಣಯ ಕೈಗೊಳ್ಳಬೇಕಾಗುತ್ತದೆ. ಇಂಥ ಮಹತ್ವದ ಸಭೆಗಳಿಗೆ ಕೆಲ ಗ್ರಾಪಂ ಸದಸ್ಯರು ಮತ್ತು ಸಿಬ್ಬಂದಿ ಕುಡಿದು ಭಾಗವಹಿಸುವುದಲ್ಲದೆ, ಅಸಭ್ಯವಾಗಿ ವರ್ತಿಸುತ್ತಾರೆ. ಪಂಚಾಯಿತಿ ಕಾರ್ಯಗಳಿಗೂ ಅಡ್ಡಿಪಡಿಸುತ್ತಾರೆ. ಇದರಿಂದ ಅನೇಕ ಸಭೆಗಳು ಅಪೂರ್ಣಗೊಂಡು ಅಭಿವೃದ್ಧಿ ಕುಂಠಿತವಾಗುತ್ತಿದೆ ಎಂದು ಗ್ರಾಮಸ್ಥರು ಆರೋಪಿಸಿದ್ದಾರೆ.
ಕುಡಿದ ಮತ್ತಿನಲ್ಲಿ ಬರುವ ಸದಸ್ಯರು, ಸಿಬ್ಬಂದಿ ವರ್ತನೆಯಿಂದ ಮಹಿಳಾ ಸದಸ್ಯರು ಗ್ರಾಪಂ ಸಭೆಯಲ್ಲಿ ಭಾಗವಹಿಸಲು ಹಿಂದೇಟು ಹಾಕುವಂತಾಗಿದೆ. ಗ್ರಾಮದ ಹಿತದೃಷ್ಟಿಯಿಂದ, ಮಹಿಳಾ ಸದಸ್ಯರು ಗೌರವಕ್ಕೆ ಕುಂದು ಬರದಂತೆ ತಡೆಗಟ್ಟುವುದು ಅತ್ಯವಶ್ಯವಾಗಿದೆ. ಹೀಗಾಗಿ ಗ್ರಾಪಂನಲ್ಲಿ ಮದ್ಯ ಸೇವನೆ ಪರೀಕ್ಷೆ ಯಂತ್ರ (ಅಲ್ಕೋಹಾಲ್‌ ಬ್ರೀತ್‌ ಟೆಸ್ಟರ್‌) ಅಳವಡಿಸಬೇಕು. ಯಾರು ಕುಡಿದು ಸಭೆಗೆ ಹಾಜರಾಗುತ್ತಾರೋ ಅಂಥವರ ವಿರುದ್ಧ ಕ್ರಮ ಕೈಗೊಳ್ಳಬೇಕು ಎಂದು ಸಾಮಾಜಿಕ ಕಾರ್ಯಕರ್ತ ಉಸ್ಮಾನಅಲಿ ನಮಾಲಿ ಜಿಪಂ ಸಿಇಒಗೆ ಮನವಿ ಸಲ್ಲಿಸಿದ್ದಾರೆ.
ವ್ಯಕ್ತಿಗತ ಆರೋಪ ಅಲ್ಲ:
ಈ ಹಿಂದಿನ ಗ್ರಾಪಂ ಸಭೆಗಳಲ್ಲಿ ಕೆಲ ಸದಸ್ಯರು ಕುಡಿದು ಬಂದು ಅನುಚಿತವಾಗಿ ವರ್ತಿಸಿರುವುದು ಗುಟ್ಟಾಗಿ ಉಳಿದಿಲ್ಲ. ಗ್ರಾಮದ ಅಭಿವೃದ್ಧಿಗೆ ಪ್ರಜ್ಞಾಪೂರ್ವಕವಾಗಿ ನಿರ್ಣಯ ಕೈಗೊಳ್ಳಬೇಕಾದ ಸದಸ್ಯರೇ ಕುಡಿದು, ಬೇಕಾಬಿಟ್ಟಿಯಾಗಿ ಸಭೆಗೆ ಹಾಜರಾಗುವುದರಿಂದ ಗ್ರಾಮದ ಅಭಿವೃದ್ಧಿ ಸಾಧ್ಯವಿಲ್ಲ. ಹೀಗಾಗಿ ವ್ಯಕ್ತಿಗತವಾಗಿ ಆರೋಪಿಸುವ ಬದಲು, ಅಲ್ಕೋಹಾಲ್‌ ಬ್ರೀತ್‌ ಟೆಸ್ಟರ್‌ ಅಳವಡಿಸಿ, ತಪ್ಪಿತಸ್ಥರ ಯಾರೇ ಇದ್ದರೂ ಅವರನ್ನು ಸಭೆಯಿಂದ ಹೊರಹಾಕುವ ಅಥವಾ ಅವರ ವಿರುದ್ಧ ಕ್ರಮ ಕೈಗೊಳ್ಳಬೇಕು ಎಂದು ಒತ್ತಾಯಿಸಲಾಗಿದೆ ಎನ್ನುತ್ತಾರೆ ಸಾಮಾಜಿಕ ಕಾರ್ಯಕರ್ತ ಉಸ್ಮಾನಅಲಿ ನಮಾಜಿ.
