ಗಂಡನ ಜೊತೆ ಜಗಳದ ಬಳಿಕ 9ನೇ ಮಹಡಿಯಿಂದ ಹಾರಿದ ಮಹಿಳೆ ಪವಾಡ ಸದೃಶವಾಗಿ ಪಾರು, ಹೇಗೆ?
ಹೈಲೈಟ್ಸ್‌:
- ಗಂಡನ ಜೊತೆಗೆ ಜಗಳ ಮಾಡಿಕೊಂಡು 9ನೇ ಮಹಡಿಯಿಂದ ಹಾರಿದ ಮಹಿಳೆ
- ಉತ್ತರಪ್ರದೇಶದ ಘಾಜಿಯಾಬಾದ್‌ನಲ್ಲಿ ಕೆಳಗೆ ಹಾರಿದ ಮಹಿಳೆ
- ಪವಾಡ ಸದೃಶವಾಗಿ ಬದುಕುಳಿದ ಮಹಿಳೆ, ಹೇಗೆ ಗೊತ್ತಾ?
ಹೊಸದಿಲ್ಲಿ: ಕೌಟುಂಬಿಕ ಕಾದಾಟದಿಂದ ಆಕ್ರೋಶಗೊಂಡ ಮಹಿಳೆಯೊಬ್ಬರು ತಾವು ವಾಸವಾಗಿದ್ದ ಅಪಾರ್ಟ್‌ಮೆಂಟಿನ ಒಂಬತ್ತನೇ ಮಹಡಿಯಿಂದ ಜಿಗಿದು ಆತ್ಮಹತ್ಯೆಗೆ ಯತ್ನಿಸಿದ ಹೊರತಾಗಿಯೂ ಬದುಕುಳಿದ ಪವಾಡ ಉತ್ತರಪ್ರದೇಶದ ಘಾಜಿಯಾಬಾದ್‌ನಲ್ಲಿ ನಡೆದಿದೆ.
ಆತ್ಮಹತ್ಯೆಗೆ ಯತ್ನಿಸಿದ ಮಹಿಳೆ ಮತ್ತು ಆಕೆಯ ಕುಟುಂಬ ಸದಸ್ಯನ ಬಗ್ಗೆ ಹೆಚ್ಚಿನ ವಿವರಗಳು ಲಭ್ಯವಾಗಿಲ್ಲ. ಮಹಿಳೆಯ ಪತಿ ಆಗಿರಬಹುದಾದ ವ್ಯಕ್ತಿ ಮೊದಲು ಬಾಲ್ಕನಿಯಲ್ಲಿ ಕಾಣಿಸುತ್ತಾರೆ. ಆತನೊಂದಿಗೆ ತೀವ್ರ ವಾಗ್ವಾದ ನಡೆಸುತ್ತಿದ್ದ ಮಹಿಳೆ ಹಠಾತ್ತನೆ ಬಾಲ್ಕನಿಯ ರೈಲಿಂಗ್‌ ಏರಿ ಹೊರ ಜಿಗಿಯುತ್ತಾರೆ.
ಆಗ ದಿಕ್ಕೆಟ್ಟ ವ್ಯಕ್ತಿ, ತಕ್ಷಣ ಮಹಿಳೆಯ ಕೈಹಿಡಿದು ನೇತಾಡುವ ಸ್ಥಿತಿಯಲ್ಲಿ ಹಿಡಿದಿಡುತ್ತಾನೆ. ಸುಮಾರು ಮೂರು ನಿಮಿಷ ಬಿಗಿಹಿಡಿಯುತ್ತಾನೆ. ಕೊನೆಗೆ ಕೊಸರಾಟದಿಂದ ಹಿಡಿತ ಕಳಚಿ ಮಹಿಳೆ ಪಲ್ಟಿ ಹೊಡೆಯುತ್ತಾ ಕೆಳಗೆ ಬೀಳುತ್ತಾಳೆ. ಅದೃಷ್ಟವಶಾತ್‌, ಕೆಳಗಡೆ ಹಾಸಿದ್ದ ಕುಷನ್‌ ಮೇಲೆ ಆಕೆ ಬಿದ್ದಿದ್ದು, ಜೀವ ಉಳಿದಿದೆ.
