Verdict: ವಿವಾಹಿತರು ಬೇರೆಯವರ ಜೊತೆ ಲೈಂಗಿಕ ಸಂಬಂಧ ಹೊಂದುವುದು ಅಪರಾಧವಲ್ಲ: ಹೈಕೋರ್ಟ್!

ಜೈಪುರ: ವಿವಾಹಿತರು ಬೇರೆಯವರ ಜೊತೆ ಲೈಂಗಿಕ ಸಂಬಂಧ ಹೊಂದುವುದು ಅಪರಾಧವಲ್ಲ ಎಂದು ಹೇಳುವ ಮೂಲಕ ರಾಜಸ್ಥಾನ ಹೈಕೋರ್ಟ್​ (Rajasthan High Court) ಅಚ್ಚರಿ ಮೂಡಿಸಿದೆ. ಕಾನೂನು ಅಡಿಯಲ್ಲಿ ವಯಸ್ಕರು ಮದುವೆಯ ಹೊರಗೆ ಸ್ವಇಚ್ಛೆಯಿಂದ ಲೈಂಗಿಕತೆಯನ್ನು ಹೊಂದುವುದು ಅಪರಾಧವಲ್ಲ ಎಂದು ರಾಜಸ್ಥಾನ ಹೈಕೋರ್ಟ್ ಇತ್ತೀಚೆಗೆ ಪ್ರಕರಣವೊಂದರಲ್ಲಿ ತೀರ್ಪು ನೀಡಿದೆ.  ಭಾರತೀಯ ದಂಡ ಸಂಹಿತೆಯ (IPC) ಸೆಕ್ಷನ್ 497 ರ ಅಡಿಯಲ್ಲಿ ವ್ಯಭಿಚಾರ ಅಪರಾಧವಾಗಿದೆ. ಆದರೆ 2018 ರಲ್ಲಿ ಸುಪ್ರೀಂ ಕೋರ್ಟ್ ಇದನ್ನು ಅಸಂವಿಧಾನಿಕ ಎಂದು ಹೇಳಿದೆ ಎಂದು ನ್ಯಾಯಮೂರ್ತಿ ಬೀರೇಂದ್ರ ಕುಮಾರ್ ತಮ್ಮ ತೀರ್ಪಿನಲ್ಲಿ ಉಲ್ಲೇಖಿಸಿದ್ದಾರೆ.

ಏನಿದು ಪ್ರಕರಣ?

ಎಸ್.ಖುಷ್ಬೂ ಹಾಗೂ ಕನ್ನಿಯಮ್ಮಾಳ್ ಪ್ರಕರಣದಲ್ಲಿ ತೀರ್ಪನ್ನು ನೀಡಲಾಗಿದೆ. ವಯಸ್ಕರು ಮದುವೆಯಾಚಗೆ ಸ್ವಇಚ್ಛೆಯಿಂದ ಲೈಂಗಿಕ ಸಂಬಂಧಗಳಲ್ಲಿ ತೊಡಗಿಕೊಂಡಾಗ ಯಾವುದೇ ಶಾಸನಬದ್ಧ ಅಪರಾಧ ನಡೆಯುವುದಿಲ್ಲ. ಈ ಪ್ರಕರಣದಲ್ಲಿ ಮಾಡುತ್ತಿರುವ ಆರೋಪ ಸೆಕ್ಷನ್ 497 ರ ಅಡಿಯಲ್ಲಿ ಅಪರಾಧವಾಗಿದೆ. ಆದರೆ ಸುಪ್ರೀಂ ಕೋರ್ಟ್​ ಈಗಾಗಲೇ ಈ ಸೆಕ್ಷನ್​ ಅನ್ನು ತೆಗೆದು ಹಾಕಿರುವುದರಿಂದ ಈ ಪ್ರಕರಣದಲ್ಲಿ ಯಾವುದೇ ಅಪರಾಧ ಕಂಡು ಬರುವುದಿಲ್ಲ ಎಂದು ಕೋರ್ಟ್​ ಹೇಳಿದೆ.

ಪತಿಯ ವಾದವೇನು?

ಭಾರತೀಯ ದಂಡ ಸಂಹಿತೆಯ ಸೆಕ್ಷನ್ 366 (ಮಹಿಳೆಯನ್ನು ಅಪಹರಣ, ಅಪಹರಣ ಅಥವಾ ಮದುವೆಗೆ ಒತ್ತಾಯಿಸುವುದು) ಅಡಿಯಲ್ಲಿ ನ್ಯಾಯಾಲಯವು ಎಫ್‌ಐಆರ್ ಅನ್ನು ರದ್ದುಗೊಳಿಸಿರುವ ಆದೇಶವನ್ನು ಹಿಂಪಡೆಯಲು ಕೋರಿ ವ್ಯಕ್ತಿಯೊಬ್ಬರು ಸಲ್ಲಿಸಿದ ಅರ್ಜಿಯನ್ನು ನ್ಯಾಯಾಲಯವು ವಿಚಾರಣೆ ನಡೆಸುತ್ತಿದೆ. ತನ್ನ ಪತ್ನಿಯನ್ನು ಮೂವರು ವ್ಯಕ್ತಿಗಳು ಅಪಹರಿಸಿದ್ದಾರೆ ಎಂದು ಆರೋಪಿಸಿ ಎಫ್‌ಐಆರ್ ದಾಖಲಿಸಿದ್ದಾರೆ.

ವಿವಾಹೇತರ ಸಂಬಂಧ ಒಪ್ಪಿಕೊಂಡ ಪತ್ನಿ

ಅರ್ಜಿದಾರರು ಮತ್ತೊಂದು ಅಪರಾಧಕ್ಕಾಗಿ ಜೈಲಿನಲ್ಲಿರುವ ಕಾರಣ ಪ್ರಕರಣದಲ್ಲಿ ಹಾಜರಾಗಲು ಸಾಧ್ಯವಾಗಲಿಲ್ಲ. ಈ ಮಧ್ಯೆ, ಅವರ ಪತ್ನಿ ನ್ಯಾಯಾಲಯಕ್ಕೆ ಹಾಜರಾಗಿ ಆರೋಪಿಗಳಲ್ಲಿ ಒಬ್ಬನೊಂದಿಗೆ ಸ್ವಯಂಪ್ರೇರಿತ ಲಿವ್-ಇನ್ ಸಂಬಂಧದಲ್ಲಿ ಇದ್ದೆ ಎಂದು ಹೇಳಿದರು.

ವಿವಾಹೇತರ ಸಂಬಂಧವನ್ನು ರಕ್ಷಿಸಬಾರದು

ಅರ್ಜಿದಾರರ (ಪತಿ) ಪರ ವಕೀಲ ಅಂಕಿತ್ ಖಂಡೇಲ್ವಾಲ್ ಅವರು, ಅರ್ಜಿದಾರರ ಪತ್ನಿ ವಿವಾಹೇತರ ಸಂಬಂಧವನ್ನು ಒಪ್ಪಿಕೊಂಡಿದ್ದಾರೆ. ಹೀಗಾಗಿ  ಐಪಿಸಿಯ ಸೆಕ್ಷನ್ 494 (ಗಂಡ ಅಥವಾ ಹೆಂಡತಿ ಬದುಕಿದ್ದಾಗಲೇ ಮತ್ತೆ ಮದುವೆಯಾಗುವುದು) ಮತ್ತು 497 (ವ್ಯಭಿಚಾರ) ಅಡಿಯಲ್ಲಿ ಅಪರಾಧ ಎಂದು ವಾದಿಸಿದರು. ಜೊತೆಗೆ ಸಾಮಾಜಿಕ ನೈತಿಕತೆಯನ್ನು ರಕ್ಷಿಸಲು ನ್ಯಾಯಾಲಯ ತನ್ನ ಅಧಿಕಾರವನ್ನು ಬಳಸಬೇಕು. ವಿವಾಹೇತರ ಸಂಬಂಧವನ್ನು ರಕ್ಷಿಸಬಾರದು ಎಂದು ಅವರು ವಾದಿಸಿದರು.