ಐಂದ್ರಿತಾ ರೇ ಜೊತೆ ಫಾಸಿಲ್‌ ನಂಟು? ಪರಿಚಯವೂ ಇಲ್ಲ; ಭೇಟಿಯೂ ಆಗಿಲ್ಲ ಎಂದ ನಟಿ
ನಟಿ ರಾಗಿಣಿ ಮತ್ತು ಸಂಜನಾ ಬಳಿಕ ಸ್ಯಾಂಡಲ್‌ವುಡ್‌ನ ಮತ್ತೊಬ್ಬ ನಟಿ ಐಂದ್ರಿತಾ ರೇ ಅವರಿಗೆ ಡ್ರಗ್‌ ಪೆಡ್ಲರ್‌ ಶೇಖ್‌ ಫಾಸಿಲ್‌ ಜತೆ ನಂಟು ಇದೆಯೇ ಎಂಬ ಪ್ರಶ್ನೆ ಮೂಡಿದೆ. ಆ ಬಗ್ಗೆ ಐಂದ್ರಿತಾ ರೇ ಪ್ರತಿಕ್ರಿಯಿಸಿದ್ದಾರೆ.
ಶ್ರೀಲಂಕಾದಲ್ಲಿ ಫಾಸಿಲ್‌ ಆಯೋಜಿಸಿದ್ದ ಬಾಲೀಸ್‌ ಕ್ಯಾಸಿನೊ ಪಾರ್ಟಿಯಲ್ಲಿ ಐಂದ್ರಿತಾ ರೇ ಭಾಗವಹಿಸಿದ್ದಾರೆ. ಫಾಸಿಲ್‌ ಜತೆಗೆ ಸಾಕಷ್ಟು ಫೋಟೊ ಕ್ಲಿಕ್ಕಿಸಿಕೊಂಡಿದ್ದಾರೆ. ಅಲ್ಲದೆ, ‘ಪಾರ್ಟಿಗೆ ಆಹ್ವಾನಿಸಿದ್ದಕ್ಕೆ ಧನ್ಯವಾದ. ಈದ್‌ ವೇಳೆ ಬಾಲೀಸ್‌ನಲ್ಲಿ ಭೇಟಿಯಾಗೋಣಾ’ ಎಂದು ಹೇಳಿದ್ದಾರೆ. ಈ ವಿಡಿಯೊ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ.
ಇದೇ ವೇಳೆ ಬೆಂಗಳೂರಿನ ಸ್ಟಾರ್‌ ಹೋಟೆಲ್‌ವೊಂದರಲ್ಲಿಆಯೋಜಿಸಿದ್ದ ಕಾರ್ಯಕ್ರಮದಲ್ಲೂ ಐಂದ್ರಿತಾ ಮತ್ತು ಫಾಸಿಲ್‌ ಭೇಟಿಯಾಗಿದ್ದಾರೆ. ಐಂದ್ರಿತಾ ರೇ ತೆಗೆಸಿಕೊಂಡಿರುವ ಫೋಟೊದಲ್ಲಿ ಫಾಸಿಲ್‌ ಜತೆಗೆ ಬಾಲಿವುಡ್‌ ನಟ ಸಲ್ಮಾನ್‌ ಖಾನ್‌ ಸಹೋದರ ಸೋಹೇಲ್‌ ಖಾನ್‌ ಕೂಡ ಇದ್ದಾರೆ.
”ಸಿನಿಮಾ ಪ್ರಮೋಷನ್‌ಗಾಗಿ ಚಿತ್ರತಂಡ ಕೋರಿದ ಕಾರಣ ಕ್ಯಾಸಿನೊಗೆ ಹೋಗಿದ್ದೇನೆ. ಅಲ್ಲಿ ಅರ್ಬಾಜ್‌ ಖಾನ್‌, ಸೋಹೇಲ್‌ ಖಾನ್‌ ಇದ್ದರು. ಅವರ ಮೂಲಕ ಫಜೀಲ್‌ ಪರಿಚಯವಾಗಿದೆ. ನೇರ ಪರಿಚಯ ಇಲ್ಲ. ಬೆಂಗಳೂರಿನಲ್ಲಿ ಅರ್ಬಾಜ್‌ ಖಾನ್‌ ಹುಟ್ಟು ಹಬ್ಬದ ಪಾರ್ಟಿಗೆ ಹೋಗಿದ್ದೆ. ಅಲ್ಲಿ ಫಾಸಿಲ್‌ ಇದ್ದ. ಆದರೆ, ಆತನ ಪರಿಚಯ ಇಲ್ಲ ಮತ್ತು ಭೇಟಿಯಾಗಿಲ್ಲ’ ಎಂದಿದ್ದಾರೆ ಐಂದ್ರಿತಾ.
ಶ್ರೀಲಂಕಾದ ಕ್ಯಾಸಿನೊಗಳಿಗೆ ಸಿನಿಮಾ ಸಂಬಂಧಿಸಿದ ಪಾರ್ಟಿ ನಡೆಯುತ್ತವೆ. ನಮಗೂ ಆಹ್ವಾನ ಬರುತ್ತವೆ. ಅಲ್ಲಿಗೆ ಹೋದಾಗ ಫೋಟೊ ತೆಗೆದುಕೊಳ್ಳುವುದು ಸಹಜ. ಪ್ರತಿಯೊಬ್ಬರ ಹಿನ್ನೆಲೆ ಕೇಳಲಾಗದು. ನಮ್ಮ ಜೊತೆಗೆ ಫೋಟೊದಲ್ಲಿ ಇರುವವರು ತಪ್ಪು ಮಾಡಿದರೆ ನಮ್ಮನ್ನು ಕೂಡ ಪ್ರಶ್ನೆ ಮಾಡುವುದು ಎಷ್ಟು ಸರಿ” ಎಂದು ಐಂದ್ರಿತಾ ಪ್ರಶ್ನಿಸಿದ್ದಾರೆ.
