Air India: ಏರ್ ಇಂಡಿಯಾ ವಿಮಾನದಲ್ಲಿ ಹಿರಿಯ ನಾಗರಿಕರಿಗೆ ಶೇ. 50ರಷ್ಟು ರಿಯಾಯಿತಿ
Air India Offers: ಏರ್ ಇಂಡಿಯಾದಲ್ಲಿ ಟಿಕೆಟ್ ಬುಕ್ ಮಾಡುವ ಹಿರಿಯ ನಾಗರಿಕರಿಗೆ ಶೇ. 50ರಷ್ಟು ರಿಯಾಯಿತಿ ನೀಡಲಾಗುವುದು. ಆದರೆ, ಈ ಆಫರ್ ಡೊಮೆಸ್ಟಿಕ್ ವಿಮಾನಯಾನಕ್ಕೆ ಮಾತ್ರ ಅನ್ವಯವಾಗಲಿದೆ.
ನವದೆಹಲಿ (ಡಿ. 17): ಏರ್ ಇಂಡಿಯಾ ವಿಮಾನವನ್ನು ಕೇಂದ್ರ ಸರ್ಕಾರ ಖಾಸಗಿ ಕಂಪನಿಗೆ ಮಾರಾಟ ಮಾಡಲು ನಿರ್ಧರಿಸಿರುವುದು ಗೊತ್ತೇ ಇದೆ. ಈ ಏರ್ ಇಂಡಿಯಾ ವಿಮಾನ ಹಿರಿಯ ನಾಗರಿಕೆ ಹೊಸ ಆಫರ್ ನೀಡಿದ್ದು, ಏರ್ ಇಂಡಿಯಾದಲ್ಲಿ ಟಿಕೆಟ್ ಬುಕ್ ಮಾಡುವ ಹಿರಿಯ ನಾಗರಿಕರಿಗೆ ಶೇ. 50ರಷ್ಟು ರಿಯಾಯಿತಿ ನೀಡಲಾಗುವುದು. ಆದರೆ, ಈ ಆಫರ್ ಡೊಮೆಸ್ಟಿಕ್ ವಿಮಾನಯಾನಕ್ಕೆ ಮಾತ್ರ ಅನ್ವಯವಾಗಲಿದೆ. ಹಾಗೇ, 60 ವರ್ಷ ಮೇಲ್ಪಟ್ಟ ಪ್ರಯಾಣಿಕರು ಈ ರಿಯಾಯಿತಿ ಸೌಲಭ್ಯವನ್ನು ಪಡೆಯಬಹುದು. ಈ ಕುರಿತು ಏರ್ ಇಂಡಿಯಾ ವೆಬ್ಸೈಟ್ನಲ್ಲಿ ಮಾಹಿತಿ ನೀಡಲಾಗಿದೆ.
ಏರ್ ಇಂಡಿಯಾದಲ್ಲಿ ಶೇ. 50ರಷ್ಟು ರಿಯಾಯಿತಿ ಪಡೆಯುವ ಹಿರಿಯ ನಾಗರಿಕರು ಭಾರತೀಯ ಪ್ರಜೆಗಳಾಗಿರಬೇಕು. ಬೇರೆ ದೇಶದ ಪ್ರಜೆಗಳಿಗೆ ಈ ಆಫರ್ ಅನ್ವಯವಾಗುವುದಿಲ್ಲ. ಅವರು ಪ್ರಯಾಣ ಮಾಡುವ ದಿನಕ್ಕೆ ಅನ್ವಯವಾಗುವಂತೆ ಅವರಿಗೆ 60 ವರ್ಷ ತುಂಬಿರಬೇಕು. ಹಾಗೇ, ಅವರು ಭಾರತದಲ್ಲಿಯೇ ವಾಸ್ತವ್ಯ ಹೂಡಿರಬೇಕು ಎಂಬ ನಿಬಂಧನೆಗಳನ್ನೂ ಏರ್ ಇಂಡಿಯಾ ಹಾಕಿದೆ.
ಏರ್ ಇಂಡಿಯಾದಲ್ಲಿ ಮುಂದಿನ ಒಂದು ವರ್ಷದವರೆಗೆ ಈ ಆಫರ್ ಲಭ್ಯವಿರಲಿದೆ. ಪ್ರಯಾಣದ ಮೂರು ದಿನ ಮೊದಲು ಟಿಕೆಟ್ ಪಡೆಯಬೇಕು. ಪ್ರಯಾಣಿಸುವಾಗ ಹಿರಿಯ ನಾಗರಿಕರು ಐಡೆಂಟಿಟಿ ಕಾರ್ಡ್, ಪಾಸ್ಪೋರ್ಟ್, ಡಿಎಲ್, ಏರ್ ಇಂಡಿಯಾ ನೀಡಿರುವ ಸೀನಿಯರ್ ಸಿಟಿಜನ್ ಐಡಿ ದಾಖಲೆಗಳನ್ನು ತೋರಿಸಬೇಕು. ಈ ದಾಖಲೆಗಳು ಇಲ್ಲದಿದ್ದರೆ ಅವರಿಗೆ ಪ್ರಯಾಣಿಸಲು ಅವಕಾಶ ನೀಡುವುದಿಲ್ಲ. ಹಾಗೇ, ಅವರ ಟಿಕ್ ಮೊತ್ತದ ಹಣವನ್ನು ಕೂಡ ಮರುಪಾವತಿ ಮಾಡುವುದಿಲ್ಲ ಎಂದು ಏರ್ ಇಂಡಿಯಾ ತಿಳಿಸಿದೆ.
ಭಾರತದೊಳಗೆ ಪ್ರಯಾಣಿಸುವ ಹಿರಿಯ ನಾಗರಿಕರಿಗೆ ಮಾತ್ರ ಈ ಶೇ. 50ರಷ್ಟು ರಿಯಾಯಿತಿಯ ಆಫರ್ ಅನ್ವಯವಾಗುತ್ತದೆ. ಅಂತಾರಾಷ್ಟ್ರೀಯ ವಿಮಾನಗಳಿಗೆ ಇದು ಅನ್ವಯವಾಗುವುದಿಲ್ಲ. 60 ಸಾವಿರ ಕೋಟಿಗೂ ಹೆಚ್ಚು ಸಾಲವನ್ನು ಹೊಂದಿರುವ ಸರ್ಕಾರಿ ಸ್ವಾಮ್ಯದ ಏರ್ ಇಂಡಿಯಾ ವಿಮಾನವನ್ನು ಖಾಸಗಿ ಕಂಪನಿಗೆ ಮಾರಾಟ ಮಾಡಲು ನಿರ್ಧರಿಸಲಾಗಿದೆ. ಇದಕ್ಕಾಗಿ ಹರಾಜನ್ನೂ ಕರೆಯಲಾಗಿದೆ.
ಸಾವಿರಾರು ಕೋಟಿ ರೂ. ಸಾಲದಲ್ಲಿ ಸಿಲುಕಿರುವ ಏರ್ ಇಂಡಿಯಾ ವಿಮಾನಗಳ ಖರೀದಿಗೆ ಟಾಟಾ ಸಮೂಹ ಸಂಸ್ಥೆ ಮುಂದಾಗಿದೆ ಎನ್ನಲಾಗಿದೆ. ಏರ್ ಇಂಡಿಯಾವನ್ನು ಮಾರಾಟ ಮಾಡಲು ಹಲವು ಬಾರಿ ಪ್ರಯತ್ನಿಸಿದ್ದ ಕೇಂದ್ರ ಸರ್ಕಾರ ವಿಫಲವಾಗಿತ್ತು. ಡಿ 28ರೊಳಗೆ ಬಿಡ್ಡಿಂಗ್ನ ಅರ್ಹರ ಪಟ್ಟಿಯನ್ನು ಕೇಂದ್ರ ಸರ್ಕಾರ ಅಂತಿಮಗೊಳಿಸಲಿದೆ. ಇನ್ನು, ಏರ್ ಇಂಡಿಯಾ ಖರೀದಿಗೆ ಸ್ಪೈಸ್ ಜೆಟ್ಸಂಸ್ಥೆ ಹಾಗೂ ಅದಾನಿ ಸಂಸ್ಥೆ ಕೂಡ ಆಸಕ್ತಿ ತೋರಿದೆ ಎನ್ನಲಾಗಿದೆ.
