Yuvarathnaa :ರಾಜ್ಯದೆಲ್ಲೆಡೆ ಇಂದು ಯುವರತ್ನನ ಅಬ್ಬರ; ಪುನೀತ್ ಅಭಿಮಾನಿಗಳ ಸಂಭ್ರಮ
ಪವರ್ ಸ್ಟಾರ್ ಪುನೀತ್ ರಾಜ್ಕುಮಾರ್ ಅಭಿನಯದ ಬಹುನಿರೀಕ್ಷಿತ ಚಿತ್ರ ‘ಯುವರತ್ನ’ ಇಂದು ಬಿಡುಗಡೆಯಾಗಿದೆ. ರಾಜ್ಯದಲ್ಲಿ 400 ಚಿತ್ರಮಂದಿರದಲ್ಲಿ ಚಿತ್ರ ಬಿಡುಗಡೆಯಾಗಿದ್ದು, ಇಂದು ಮುಂಜಾನೆ ಆರು ಗಂಟೆಯಿಂದಲೇ ಶೋ ಪ್ರಾರಂಭವಾಗಿದ್ದು, ಹೌಸ್ಫುಲ್ ಪ್ರದರ್ಶನ ಕಾಣುತ್ತಿದೆ. ಅಪ್ಪು ಅಭಿಮಾನಿಗಳು ಈಗಾಗಲೇ ಟಿಕೆಟ್ ಬುಕ್ಕಿಂಗ್ ಮಾಡಿದ್ದಾರೆ. ಕನ್ನಡ ಮತ್ತು ತೆಲಗಿನಲ್ಲಿ ಚಿತ್ರ ಏಕಕಾಲಕ್ಕೆ ಬಿಡುಗಡೆಯಾಗಿದೆ. ತೆಲಂಗಾಲ- ಆಂಧ್ರದ 300ಕ್ಕೂ ಹೆಚ್ಚು ಚಿತ್ರಮಂದಿರದಲ್ಲಿ ಯುವರತ್ನ ಸಿನಿಮಾ ತೆರೆಕಂಡಿದೆ. ಸಿಲಿಕಾನ್ಸಿಟಿಯ ನವರಂಗ್, ಸಿದ್ದಲಿಂಗೇಶ್ವರ, ಅಂಜನ್, ಸೇರಿದಂತೆ ಬೆಂಗಳೂರಿನ ಹಲವೆಡೆ ಮುಂಜಾನೆ 6 ಗಂಟೆಯಿಂದ ಶೋ ಆರಂಭವಾಗಿದ್ದು, ಅಭಿಮಾನಿಗಳು ಅಪ್ಪು ನಟನೆಗೆ ಬಹುಪರಾಕ್ ಹಾಡಿದ್ದಾರೆ. ಈ ಹಿಂದೆ ‘ರಾಜಕುಮಾರ’ ನಂತಹ ಬಿಗ್ ಹಿಟ್ ಸಿನಿಮಾ ನೀಡಿದ್ದ ಸಂತೋಷ್ ಆನಂದ್ರಾಮ್ ಮತ್ತು ಪುನೀತ್ ಜೋಡಿ ಈಗ ‘ಯುವರತ್ನ’ದಲ್ಲಿಯೂ ಜೊತೆಯಾಗಿದೆ. ಈ ಹಿನ್ನಲೆ ಈ ಚಿತ್ರ ಕೂಡ ನಿರೀಕ್ಷೆಗೂ ಮೀರಿ ಹಿಟ್ ಆಗುವ ಸಾಧ್ಯತೆ ಇದೆ ಎನ್ನಲಾಗಿದೆ.
ಇನ್ನು ಹೊಂಬಾಳೆ ಬ್ಯಾನರ್ನಲ್ಲಿ ಈ ಚಿತ್ರ ಮೂಡಿ ಬಂದಿದ್ದು, ವಿಜಯ ಕಿರಗಂದೂರು ಈ ಅದ್ದೂರಿ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ. ಪುನೀತ್ಗೆ ಇದೇ ಮೊದಲ ಬಾರೊ ಸಯೇಶಾ ಸೆಹಗಲ್ ಜೋಡಿಯಾಗಿದ್ದು, ಪ್ರಕಾಶ್ ರಾಜ್, ಶರತ್ ಕುಮಾರ್, ರಂಗಾಯಣ ರಘು, ಅವಿನಾಶ್, ದಿಗಂತ್, ಧನಂಜಯ್ ಸೇರಿದಂತೆ ಬಹುತಾರಾಗಣ ಚಿತ್ರದಲ್ಲಿದೆ.
ಟ್ವಿಟರ್ನಲ್ಲಿ ಟ್ರೆಂಡ್ ಆದ ಯುವರತ್ನ:
ಬಿಡುಗಡೆಯಾದ ಕೆಲವೇ ನಿಮಿಷಗಳಲ್ಲಿ ‘ಯುವರತ್ನ’ ಸಿನಿಮಾದ ಹೆಸರು ಟ್ವಿಟರ್ನಲ್ಲಿ ಟ್ರೆಂಡ್ ಆಗಿದೆ. ಪುನೀತ್ ಅಭಿಮಾನಿಗಳು ಚಿತ್ರದ ಹೆಸರನ್ನು ಟ್ರೆಂಡ್ ಮಾಡಿದ್ದು, ಅಪ್ಪುಗೆ ಬಹುಪರಾಕ್ ಹೇಳಿದ್ದಾರೆ.
ಅಭಿಮಾನಿಗಳಿಗೆ ಹಬ್ಬ
ಕಳೆದೆರಡು ವರ್ಷಗಳಿಂದ ಪುನೀತ್ ರಾಜ್ಕುಮಾರ್ ಅಭಿಮಾನಿಗಳು ಈ ಚಿತ್ರಕ್ಕೆ ಕಾತುರರಾಗಿದ್ದರು. ಚಿತ್ರದ ಟೀಸರ್ ಮೂಲಕ ಮತ್ತು ಹಾಡುಗಳ ಮೂಲಕ ಚಿತ್ರದ ನಿರೀಕ್ಷೆ ಇನ್ನಷ್ಟು ಹೆಚ್ಚಿತ್ತು. ಕೋವಿಡ್ ನಂತರದಲ್ಲಿ ಬಿಡುಗಡೆಯಾಗುತ್ತಿರುವ ಅದ್ಧೂರಿ ಚಿತ್ರ ಇದಾಗಿದ್ದು, ಅಭಿಮಾನಿಗಳು ಸಂತಸ ವ್ಯಕ್ತಪಡಿಸಿದ್ದಾರೆ
