ಕೋವಿಡ್ ಸಂಕಷ್ಟ: ನಟ ಸೋನು ಸೂದ್ ಜೊತೆ ಕೈ ಜೋಡಿಸಿದ ನಟಿ ಸಾರಾ ಅಲಿ ಖಾನ್
ಹೈಲೈಟ್ಸ್‌:
- ಸೋನು ಸೂದ್ ಜೊತೆ ಕೈ ಜೋಡಿಸಿದ ಸಾರಾ ಅಲಿ ಖಾನ್
- ಸೂದ್ ಫೌಂಡೇಶನ್‌ಗೆ ದೇಣಿಗೆ ನೀಡಿದ ಸಾರಾ ಅಲಿ ಖಾನ್
- ಸಾರಾ ಅಲಿ ಖಾನ್‌ಗೆ ಧನ್ಯವಾದ ತಿಳಿಸಿ ಟ್ವೀಟ್ ಮಾಡಿದ ಸೋನು ಸೂದ್
ಭಾರತದಲ್ಲಿ ಕೋವಿಡ್ ಎರಡನೇ ಅಲೆ ಭೀಕರವಾಗಿದ್ದು, ಪ್ರತಿ ದಿನ 4 ಲಕ್ಷಕ್ಕೂ ಅಧಿಕ ಸೋಂಕಿತರು ಪತ್ತೆಯಾಗುತ್ತಿದ್ದಾರೆ. ಚಿಕಿತ್ಸೆಗಾಗಿ ಆಸ್ಪತ್ರೆಯಲ್ಲಿ ಬೆಡ್ ಸಿಗದೆ ಸೋಂಕಿತರು ನರಳುತ್ತಿದ್ದಾರೆ. ಆಕ್ಸಿಜನ್‌ಗಾಗಿಯೂ ಹಾಹಾಕಾರ ಉಂಟಾಗಿದೆ. ಈ ಪರಿಸ್ಥಿತಿಯಲ್ಲಿ ಅನೇಕರಿಗೆ ಆಸ್ಪತ್ರೆಗಳಲ್ಲಿ ಬೆಡ್ ವ್ಯವಸ್ಥೆ ಮಾಡುತ್ತಿದ್ದಾರೆ
ಬಾಲಿವುಡ್ ನಟ ಸೋನು ಸೂದ್. ಜೊತೆಗೆ ಅವಶ್ಯವಿರುವವರಿಗೆ ಆಕ್ಸಿಜನ್ ಸಿಲಿಂಡರ್‌ಗಳನ್ನೂ ಸೋನು ಸೂದ್ ಕಳುಹಿಸಿಕೊಡುತ್ತಿದ್ದಾರೆ.
ತಮ್ಮ ಸೂದ್ ಫೌಂಡೇಶನ್ ಮೂಲಕ ಹಲವರಿಗೆ ಸೋನು ಸೂದ್ ಸಹಾಯ ಹಸ್ತ ಚಾಚಿದ್ದಾರೆ. ಇದೀಗ ನಟ ಸೋನು ಸೂದ್ ಜೊತೆಗೆ ನಟಿ ಸಾರಾ ಅಲಿ ಖಾನ್ ಕೈ ಜೋಡಿಸಿದ್ದಾರೆ. ಸೂದ್ ಫೌಂಡೇಶನ್‌ಗೆ ಬಾಲಿವುಡ್ ನಟಿ ಸಾರಾ ಅಲಿ ಖಾನ್ ದೇಣಿಗೆ ನೀಡಿದ್ದಾರೆ. ಈ ಬಗ್ಗೆ ನಟ ಸೋನು ಸೂದ್ ಟ್ವೀಟ್ ಮಾಡಿ, ಸಾರಾ ಅಲಿ ಖಾನ್‌ಗೆ ಧನ್ಯವಾದ ತಿಳಿಸಿದ್ದಾರೆ.
”ನಿಮಗೆ ಧನ್ಯವಾದಗಳು ಸಾರಾ ಅಲಿ ಖಾನ್. ನಿಮ್ಮ ಬಗ್ಗೆ ನನಗೆ ಹೆಮ್ಮೆ ಇದೆ. ಒಳ್ಳೆಯ ಕೆಲಸಗಳನ್ನು ಮಾಡುತ್ತಿರಿ. ಇಂತಹ ಸಂಕಷ್ಟದ ಸಮಯದಲ್ಲಿ ಮುಂದೆ ಬಂದು ಸಹಾಯ ಮಾಡಲು ನೀವು ಯುವ ಜನರಿಗೆ ಪ್ರೇರಣೆಯಾಗಿದ್ದೀರಿ. ಯು ಆರ್ ಎ ಹೀರೋ” ಎಂದು ನಟ ಸೋನು ಸೂದ್ ಟ್ವೀಟ್ ಮಾಡಿದ್ದಾರೆ.
ಅಂದ್ಹಾಗೆ, ನಟ ಸೋನು ಸೂದ್ ಮತ್ತು ಸಾರಾ ಅಲಿ ಖಾನ್ ಒಟ್ಟಿಗೆ ‘ಸಿಂಬಾ’ ಚಿತ್ರದಲ್ಲಿ ನಟಿಸಿದ್ದರು. ರಣ್ವೀರ್ ಸಿಂಗ್ ಅಭಿನಯದ ‘ಸಿಂಬಾ’ ಚಿತ್ರ ಬಾಕ್ಸ್‌ಆಫೀಸ್‌ನಲ್ಲಿ ಕಮಾಲ್ ಮಾಡಿತ್ತು.
