ಭಾರತದಲ್ಲಿ ಇಂದು 4.03 ಲಕ್ಷ ಮಂದಿಗೆ ಕೋವಿಡ್ ಸೋಂಕು, 4,092 ಮಂದಿ ಸಾವು
ಹೈಲೈಟ್ಸ್‌:
- ಭಾರತದಲ್ಲಿ ಇಂದು 4.03 ಲಕ್ಷ ಕೋವಿಡ್ ಪ್ರಕರಣ
- ಸತತ ಎರಡನೆಯ ದಿನ 4 ಸಾವಿರಕ್ಕೂ ಅಧಿಕ ಸಾವು
- ಡಿಆರ್‌ಡಿಒ ಔಷಧದ ತುರ್ತು ಬಳಕೆಗೆ ಅನುಮತಿ
ಹೊಸದಿಲ್ಲಿ: ಭಾರತದಲ್ಲಿ ಸತತ ಐದನೇ ದಿನ ನಾಲ್ಕು ಲಕ್ಷಕ್ಕೂ ಅಧಿಕ ಪ್ರಕರಣಗಳು ದಾಖಲಾಗಿವೆ. ಈವರೆಗಿನ ಅತ್ಯಧಿಕ 4.14 ಲಕ್ಷ ಪ್ರಕರಣಗಳನ್ನು ಮುಟ್ಟಿದ ನಂತರ ಕಳೆದ ಎರಡು ದಿನಗಳಲ್ಲಿ ಅದಕ್ಕಿಂತ ಕಡಿಮೆ ಸಂಖ್ಯೆಯಲ್ಲಿ ಸೋಂಕಿತರು ವರದಿಯಾಗಿರುವುದೊಂದೇ ಸಮಾಧಾನಕರ ಸಂಗತಿ.
ಕಳೆದ 24 ಗಂಟೆಗಳಲ್ಲಿ ದೇಶದಲ್ಲಿ 4,03,738 ಮಂದಿ ಸೋಂಕಿತರು ಪತ್ತೆಯಾಗಿದ್ದಾರೆ. ಒಂದೇ ದಿನದಲ್ಲಿ 4,092 ಮಂದಿ ಸೋಂಕಿಗೆ ಬಲಿಯಾಗಿದ್ದಾರೆ. ಹಾಗೆಯೇ 3,86,444 ಮಂದಿ ಕೋವಿಡ್‌ನಿಂದ ಗುಣಮುಖರಾಗಿದ್ದಾರೆ.
ದೇಶದಲ್ಲಿ ಇದುವರೆಗೂ 2,22,96,414 ಮಂದಿ ಕೊರೊನಾ ವೈರಸ್‌ಗೆ ತುತ್ತಾಗಿರುವುದು ವರದಿಯಾಗಿದೆ. ಅವರಲ್ಲಿ 1,83,17,404 ಮಂದಿ ಈವರೆಗೆ ಬಿಡುಗಡೆಯಾಗಿದ್ದಾರೆ. ಹಾಗೆಯೇ ಸೋಂಕಿತರಲ್ಲಿ ಈವರೆಗೂ ಮೃತಪಟ್ಟವರ ಒಟ್ಟು ಸಂಖ್ಯೆ 2,42,362ಕ್ಕೆ ಏರಿಕೆಯಾಗಿದೆ. 37,36,648 ಸಕ್ರಿಯ ಪ್ರಕರಣಗಳಿವೆ. ಇದುವರೆಗೂ 16,94,39,663 ಡೋಸ್ ಲಸಿಕೆಗಳನ್ನು ನೀಡಲಾಗಿದೆ.
ಭಾರತವು ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆ (ಡಿಆರ್‌ಡಿಒ) ಅಭಿವೃದ್ಧಿಪಡಿಸಿದ ಕೋವಿಡ್ ನಿಗ್ರಹ ಔಷಧದ ತುರ್ತು ಬಳಕೆಗೆ ಔಷಧ ನಿಯಂತ್ರಣ ಪ್ರಾಧಿಕಾರ (ಡಿಸಿಜಿಐ) ಅನುಮೋದನೆ ನೀಡಿರುವುದು ಭಾರತಕ್ಕೆ ಶುಭ ಸುದ್ದಿಯಾಗಿದೆ. ಈ ಔಷಧದ ಕ್ಲಿನಿಕಲ್ ಪ್ರಯೋಗವು ಆಸ್ಪತ್ರೆಗೆ ದಾಖಲಾದ ಕೋವಿಡ್ ರೋಗಿಗಳ ತ್ವರಿತ ಚಿಕಿತ್ಸೆಗೆ ನೆರವಾಗಿರುವುದು ಹಾಗೂ ಆಕ್ಸಿಜನ್ ಅವಲಂಬನೆಯನ್ನು ತಗ್ಗಿಸಿರುವುದು ದಾಖಲಾಗಿದೆ.
