ಪೈರಸಿ ವಿರುದ್ಧ ಗುಡುಗಿದ ಸಲ್ಮಾನ್: ಫ್ರೀಯಾಗಿ ಕೊಟ್ರೂ ‘ರಾಧೆ’ ನೋಡಲ್ಲ ಅಂತ ಟ್ರೋಲ್ ಮಾಡಿದ ನೆಟ್ಟಿಗರು!
ಹೈಲೈಟ್ಸ್‌:
- ‘ರಾಧೆ’ ಚಿತ್ರಕ್ಕೆ ಪೈರಸಿ ಕಾಟ
- ಪೈರಸಿ ವಿರುದ್ಧ ಗುಡುಗಿದ ಸಲ್ಮಾನ್ ಖಾನ್
- ”ಫ್ರೀಯಾಗಿ ಕೊಟ್ರೂ ‘ರಾಧೆ’ ಚಿತ್ರ ನೋಡಲ್ಲ” ಅಂತ ಸಲ್ಮಾನ್ ಕಾಲೆಳೆದ ನೆಟ್ಟಿಗರು
ಸಲ್ಮಾನ್ ಖಾನ್ ಅಭಿನಯದ ‘ರಾಧೆ: ಯುವರ್ ಮೋಸ್ಟ್ ವಾಂಟೆಡ್ ಭಾಯ್’ ಚಿತ್ರ ಮೇ 13 ರಂದು ಒಟಿಟಿ ಪ್ಲಾಟ್‌ಫಾರ್ಮ್‌ ಮೂಲಕ ಬಿಡುಗಡೆಯಾಯ್ತು. ರಿಲೀಸ್ ಆದ ಕೆಲವೇ ಗಂಟೆಗಳ ಅಂತರದಲ್ಲಿ ‘ ರಾಧೆ‘ ಆನ್‌ಲೈನ್‌ನಲ್ಲಿ ಲೀಕ್ ಆಯ್ತು. ಪೈರೇಟೆಡ್ ವೆಬ್‌ತಾಣಗಳಲ್ಲಿ ‘ರಾಧೆ’ ಚಿತ್ರ ಎಚ್‌ಡಿ ಕ್ವಾಲಿಟಿಯಲ್ಲೇ ಲಭ್ಯವಿತ್ತು.
”ಪೈರಸಿ ಮಾಡಬೇಡಿ.. ಪೈರೇಟೆಡ್ ವೆಬ್‌ತಾಣಗಳಲ್ಲಿ ‘ರಾಧೆ’ ಚಿತ್ರವನ್ನು ವೀಕ್ಷಿಸಬೇಡಿ” ಅಂತ ಸಲ್ಮಾನ್ ಖಾನ್ ಮನವಿ ಮಾಡಿದ್ದರೂ, ‘ರಾಧೆ’ ಚಿತ್ರಕ್ಕೆ ಪೈರಸಿ ಭೂತ ಕಾಡುತ್ತಲೇ ಇದೆ. ಈ ಮಧ್ಯೆ ‘ರಾಧೆ’ ಚಿತ್ರ ಬಾಯ್‌ಕಾಟ್ ಮಾಡಬೇಕೆಂಬ ಅಭಿಯಾನ ಸೋಷಿಯಲ್ ಮೀಡಿಯಾದಲ್ಲಿ ನಡೆಯುತ್ತಿದೆ. ಹಾಗೇ, ‘ರಾಧೆ’ ಚಿತ್ರಕ್ಕೆ ಅತ್ಯಂತ ಕಡಿಮೆ ರೇಟಿಂಗ್ ಕೂಡ ಲಭ್ಯವಾಗಿದೆ. ಹೀಗಿರುವಾಗಲೇ, ಪೈರಸಿ ವಿರುದ್ಧ ಮತ್ತೆ ಸಲ್ಮಾನ್ ಖಾನ್ ಸಿಡಿದೆದ್ದಿದ್ದಾರೆ. ಪೈರಸಿ ವಿರುದ್ಧ ಸಲ್ಮಾನ್ ಖಾನ್ ಟ್ವೀಟ್ ಮಾಡಿದ್ದಾರೆ.
ಸಲ್ಮಾನ್ ಖಾನ್ ಟ್ವೀಟ್
”ರಾಧೆ’ ಚಿತ್ರವನ್ನು ನಾವು ಸಮಂಜಸವಾದ ಬೆಲೆ 249 ರೂಪಾಯಿಗಳ ಪೇ-ಪರ್-ವ್ಯೂ ಮೂಲಕ ವೀಕ್ಷಿಸಲು ನಿಮಗೆ ಅವಕಾಶ ಮಾಡಿಕೊಟ್ಟಿದ್ವಿ. ಹೀಗಿದ್ದರೂ, ಪೈರೇಟೆಡ್ ತಾಣಗಳಲ್ಲಿ ‘ರಾಧೆ’ ಚಿತ್ರ ಕಾನೂನುಬಾಹಿರವಾಗಿ ಲೀಕ್ ಆಗಿದೆ. ಇದು ಅಪರಾಧ. ಎಲ್ಲಾ ಪೈರೇಟೆಡ್ ತಾಣಗಳ ವಿರುದ್ಧ ಸೈಬರ್ ಸೆಲ್‌ಗಳು ಕಠಿಣ ಕ್ರಮ ತೆಗೆದುಕೊಳ್ಳಲಿದೆ. ಈ ಪೈರಸಿಯಲ್ಲಿ ದಯವಿಟ್ಟು ಭಾಗಿಯಾಗಬೇಡಿ. ಇಲ್ಲಾಂದ್ರೆ ನಿಮ್ಮ ಮೇಲೂ ಸೈಬರ್ ಸೆಲ್ ಕ್ರಮ ತೆಗೆದುಕೊಳ್ಳುತ್ತದೆ” ಎಂದು ಸಲ್ಮಾನ್ ಖಾನ್ ಟ್ವೀಟ್ ಮಾಡಿದ್ದಾರೆ. ಸಲ್ಮಾನ್ ಖಾನ್ ಹೀಗೆ ಟ್ವೀಟ್ ಮಾಡಿದ್ದೇ ತಡ.. ಸಲ್ಮಾನ್ ಖಾನ್ ಕಾಲೆಳೆಯಲು ನೆಟ್ಟಿಗರು ಆರಂಭಿಸಿದರು.
ಕಾಲೆಳೆದ ನೆಟ್ಟಿಗರು!
”ರಾಧೆ’ ಚಿತ್ರ ನೋಡೋಕೆ 249 ರೂಪಾಯಿ ಬೇರೆ ಕೊಡಬೇಕಾ? ಅದೇ ದುಡ್ಡಲ್ಲಿ ನಾನು ಹಣ್ಣು-ತರಕಾರಿ ಕೊಳ್ಳುತ್ತೇನೆ. ದುಡ್ಡು ವೇಸ್ಟ್ ಮಾಡಲ್ಲ” ಅಂತ ನೆಟ್ಟಿಗರೊಬ್ಬರು ಟ್ವೀಟ್ ಮಾಡಿದ್ದಾರೆ.
”ರಾಧೆ’ ಚಿತ್ರ ನೋಡೋಕೆ 249 ರೂಪಾಯಿ ಕೊಡುವ ಬದಲು ಕೋವಿಡ್-19 ಪರಿಹಾರ ನಿಧಿಗೆ ದುಡ್ಡು ದಾನ ಮಾಡ್ತೀನಿ” ಅಂತಿದ್ದಾರೆ ನೆಟ್ಟಿಗರು. ”ರಾಧೆ’ ಚಿತ್ರ ನೋಡುವ ಬದಲು, ಖಾಲಿ ಸ್ಕ್ರೀನ್ ನೋಡೋದು ವಾಸಿ”, ”ರಾಧೆ’ ಚಿತ್ರವನ್ನು ಬಿಟ್ಟಿಯಾಗಿ ಕೊಟ್ಟರೂ ನೋಡಲ್ಲ”, ”ರಾಧೆ’ ಅಂತಹ ಚಿತ್ರವನ್ನು ನೋಡುವುದೇ ಅಪರಾಧ”, ”ರಾಧೆ’ ಚಿತ್ರವನ್ನು ನೋಡುವ ಬದಲು ಜೈಲಿಗೆ ಹೋಗುವುದೇ ವಾಸಿ” ಅಂತೆಲ್ಲಾ ಟ್ವೀಟಿಗರು ಟ್ರೋಲ್ ಮಾಡುತ್ತಿದ್ದಾರೆ
