ಇಎಸ್‍ಐಸಿ ಆಸ್ಪತ್ರೆ: ಡಾ. ಅಜಯಸಿಂಗ್ ಭೇಟಿ: ಆಮ್ಲಜನಕ ಉತ್ಪಾದನಾ ಘಟಕ ಸ್ಥಾಪನೆಗೆ ಆಗ್ರಹ
ಕೋವಿಡ್ ವೈದ್ಯಕೀಯ ತುರ್ತು ಸಂದರ್ಭದಲ್ಲಿಯೂ ನಗರದ ಬೃಹತ್ ಇಎಸ್‍ಐಸಿ ಆಸ್ಪತ್ರೆ ಸಂಪೂರ್ಣ ಬಳಕೆ ಆಗುತ್ತಿಲ್ಲ. ಕೂಡಲೇ ತುರ್ತು ಸಂದರ್ಭದಲ್ಲಿ ಇಎಸ್‍ಐಸಿಯಲ್ಲಿ ಆಮ್ಲನನಕ ಉತ್ಪಾದನಾ ಘಟಕ ಸ್ಥಾಪಿಸಬೇಕು ಎಂದು ರಾಜ್ಯ ವಿಧಾನಸಭೆಯಲ್ಲಿನ ವಿರೋಧ ಪಕ್ಷದ ಮುಖ್ಯ ಸಚೇತಕ ಹಾಗೂ ಜೇವರ್ಗಿ ಕ್ಷೇತ್ರದ ಕಾಂಗ್ರೆಸ್ ಶಾಸಕ ಡಾ. ಅಜಯಸಿಂಗ್ ಅವರು ಆಗ್ರಹಿಸಿದರು.
ನಗರದ ಸೇಡಂ ರಸ್ತೆಯಲ್ಲಿರುವ ಇಎಸ್‍ಐಸಿ ಕೋವಿಡ್ ಆಸ್ಪತ್ರೆಗೆ ಭಾನುವಾರ ಭೇಟಿ ನೀಡಿ ಅಲ್ಲಿನ ಪರಿಸ್ಥಿತಿಗಳನ್ನೆಲ್ಲ ಖುದ್ದು ಪರಿಶೀಲಿಸಿ ನಿರ್ದೇಶಕಿ ಡಾ. ಐವಾನ್ ಲೋಬೋ ಅವರೊಂದಿಗೆ ಮಾತುಕತೆ ನಡೆಸಿದ ಅವರು, ಇಲ್ಲಿ 500 ಹಾಸಿಗೆಗಳ ಸಾಮಥ್ರ್ಯದ ವಾರ್ಡ್‍ಗಳಿವೆ. ಆದಾಗ್ಯೂ, ಅದಕ್ಕೆ ತಕ್ಕಂತೆ ಆಕ್ಸಿಜನ್ ಪೂರೈಸುವ ಘಟಕವಿಲ್ಲ. ಹೀಗಾಗಿ ಇಂತಹ ಆಸ್ಪತ್ರೆ ಬೆಡ್ ಹಾಹಾಕಾರದಲ್ಲಿಯೂ ಇಲ್ಲೀಗ ಕೇವಲ 130 ಬೆಡ್‍ಗಳನ್ನು ಮಾತ್ರ ಕೋವಿಡ್ ರೋಗಿಗಳಿಗೆ ಬಳಕೆಯಾಗುತ್ತಿವೆ ಎಂದರು.
ತುರ್ತಾಗಿ ಇಲ್ಲಿ 25 ಕೆಎಲ್ ಸಾಮಥ್ರ್ಯದ ಆಕ್ಸಿಜನ್ ಉತ್ಪಾದನೆ ಘಟಕ ಸ್ಥಾಪನೆಯಾದಲ್ಲಿ ಇಡೀ ಆಸ್ಪತ್ರೆಯನ್ನು ಬಲು ಸಮರ್ಥವಾಗಿ ಕೋವಿಡ್ ಸೇರಿದಂತೆ ಎಲ್ಲ ವೈದ್ಯಕೀಯ ತುರ್ತು ಸಂದರ್ಭಗಳಲ್ಲಿ ಬಳಸಬಹುದು ಎಂದು ಅವರು ಹೇಳಿದರು.
ಈ ಆಸ್ಪತ್ರೆಗೆ ಕಳೆದ ವರ್ಷವೇ ಆಮ್ಲಜನಕ ಉತ್ಪಾದನೆ ಘಟಕ ಮಂಜೂರಾಗಿದ್ದರೂ ಟೆಂಡರ್ ಇತ್ಯಾದಿ ಪ್ರಕ್ರಿಯೆಗಳಲ್ಲಿಯೇ ನರಳುತ್ತಿರೋದು ಭೇಟಿ ಸಂದರ್ಭದಲ್ಲಿ ಗೊತ್ತಾಗಿದೆ. ಸ್ಥಳೀಯವಾಗಿರುವ ಸಂಸದರು ಈ ಕುರಿತು ಇಷ್ಟೊತ್ತಿಗಾಗಲೇ ಗಮನಹರಿಸಬೇಕಿತ್ತು. ಇಂತಹ ವೈದ್ಯಕೀಯ ತುರ್ತು ಕಾಲದಲ್ಲೂ ಟೆಂಡರದಲ್ಲಿಯೇ ಮಹತ್ವದ ಯೋಜನೆ ಸಿಲುಕಿ ನರಳಿದರೆ ಇಂತಹ ಬೃಹತ್ ಆಸ್ಪತ್ರೆ ಹೊಂದಿದ್ದರೂ ಸ್ಥಳೀಯ ಜನರಿಗೆ ಅದರಿಂದ ಪ್ರಯೋಜನವೇನು? ಎಂದು ಅವರು ಖಾರವಾಗಿ ಪ್ರಶ್ನಿಸಿದರು.
ಕಳೆದ ವರ್ಷವೇ ಟೆಂಡರ್ ಕರೆಯಲಾಗಿತ್ತಾದರೂ ಹಲವಾರು ತಾಂತ್ರಿಕ ಕಾರಣಗಳಿಂದ ಟೆಂಡರ್ ಪ್ರಕ್ರಿಯೆ ರದ್ದಾಗಿದೆ. ಅದಿನ್ನೂ ಪೂರ್ಣಗೊಂಡಿಲ್ಲವೆಂಬ ಸಂಗತಿ ಗಮನಕ್ಕೆ ಬಂದಿದೆ. ಇಲ್ಲಿನ ಸಂಸದರು ಬೇಗ ಈ ವಿಚಾರವಾಗಿ ಮಧ್ಯಪ್ರವೇಶ ಮಾಡಬೇಕು. ಕೇಂದ್ರದ ಮೇಲೆ ಒತ್ತಡ ತಂದು ತುರ್ತಾಗಿ ಆಕ್ಸಿಜನ್ ಘಟಕ ಇಲ್ಲಿ ತಲೆ ಎತ್ತುವಂತೆ ಮಾಡಬೇಕು ಎಂದು ಅವರು ಆಗ್ರಹಿಸಿದರು.
130 ಕೋವಿಡ್ ಹಾಸಿಗೆಗಳಿರುವ ಇಲ್ಲೀಗ 1.3 ಕೆಎಲ್ ಸಾಮಥ್ರ್ಯದ ಆಮ್ಲಜನಕ ಜನರೇಟರ್ ಪಡೆಯಲಾಗುತ್ತಿದೆ. ಅದು ಮೇ 31ರೊಳಗೆ ಇಲ್ಲಿಗೆ ಬರಲಿದೆ. ಈ ಪ್ರಮಾಣದ ಆಮ್ಲನಕ ಈಗಿರುವ ಹಾಸಿಗೆಗಳಿಗೂ ಸಾಲದು. ಪ್ರತ್ಯೇಕ 25 ಕೆಎಲ್ ಆಮ್ಲನಕ ಉತ್ಪಾದನೆ ಘಟಕವೇ ಇಲ್ಲಿನ ಸಮಸ್ಯೆಗೆ ಪರಿಹಾರ. ಇನ್ನೂ 3ನೇ ಅಲೆ ಬರೋದಿದೆ ಎಂದು ತಜ್ಞರು ಹೇಳುತ್ತಿದ್ದಾರೆ. ಹೀಗಾಗಿ ಯಾವುದೇ ಸಂದರ್ಭ ಬಂದರೂ ಸಮರ್ಥವಾಗಿ ಎದುರಿಸಬೇಕಾದಲ್ಲಿ ಇಎಸ್‍ಐಸಿಯಲ್ಲಿ ತುರ್ತಾಗಿ ಆಮ್ಲಜನಕ ಉತ್ಪಾದನೆ ಘಟಕ ಸ್ಥಾಪನೆಯಾಗಬೇಕು. ಈ ಸಂದರ್ಭ ಅರಿತು ಸಂಬಂಧಪಟ್ಟವರ ಮೇಲೆ ಒತ್ತಡ ಹೇರುವ ಮೂಲಕ ಸಂಸದರು ಆದ್ಯತೆಯ ಮೇರೆಗೆ ಕೈಗೊಳ್ಳಬೇಕು ಎಂದು ಅವರು ಒತ್ತಾಯಿಸಿದರು.
