ಅತ್ಯಾಚಾರ ಆರೋಪ: ಮಂಡ್ಯದಲ್ಲಿ ಕಂಗನಾ ಬಾಡಿಗಾರ್ಡ್ ಕುಮಾರ್ ಹೆಗ್ಡೆ ಬಂಧನ
ಹೈಲೈಟ್ಸ್‌:
- ಅರೆಸ್ಟ್ ಆದ ಕಂಗನಾ ರಣಾವತ್ ಬಾಡಿಗಾರ್ಡ್
- ಮಂಡ್ಯದಲ್ಲಿ ಕುಮಾರ್ ಹೆಗ್ಡೆಯನ್ನು ಬಂಧಿಸಿದ ಪೊಲೀಸರು
- ಕುಮಾರ್ ಹೆಗ್ಡೆ ವಿರುದ್ಧ ಅತ್ಯಾಚಾರ ಆರೋಪ ಮಾಡಿದ 30 ವರ್ಷದ ಬ್ಯೂಟೀಷಿಯನ್
ಅತ್ಯಾಚಾರ ಆರೋಪದ ಮೇಲೆ ಬಾಲಿವುಡ್ ನಟಿ ಕಂಗನಾ ರಣಾವತ್ ಅವರ ಬಾಡಿಗಾರ್ಡ್ ಕುಮಾರ್ ಹೆಗ್ಡೆ ವಿರುದ್ಧ ಮುಂಬೈ ಪೊಲೀಸರು ಎಫ್.ಐ.ಆರ್ ದಾಖಲಿಸಿಕೊಂಡಿದ್ದರು. ಇದೀಗ ಅದೇ ಪ್ರಕರಣಕ್ಕೆ ಸಂಬಂಧಿಸಿದಂತೆ ಕುಮಾರ್ ಹೆಗ್ಡೆ ಬಂಧನವಾಗಿದೆ. ಮಂಡ್ಯದಲ್ಲಿ ಕುಮಾರ್ ಹೆಗ್ಡೆಯನ್ನು ಅರೆಸ್ಟ್ ಮಾಡಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಮದುವೆಯಾಗುವುದಾಗಿ ನಂಬಿಸಿ ತಮ್ಮ ಮೇಲೆ ಅತ್ಯಾಚಾರ ಎಸಗಿದ್ದಾರೆ ಎಂದು ಆರೋಪಿಸಿ 30 ವರ್ಷದ ಬ್ಯೂಟೀಷಿಯನ್ ಕೆಲ ದಿನಗಳ ಹಿಂದೆಯಷ್ಟೇ ಮುಂಬೈ ಪೊಲೀಸರಿಗೆ ದೂರು ನೀಡಿದ್ದರು. ತಲೆಮರೆಸಿಕೊಂಡಿದ್ದ ಆರೋಪಿ ಕುಮಾರ್ ಹೆಗ್ಡೆಯನ್ನು ಹುಡುಕಲು ಆತನ ಹುಟ್ಟೂರಿಗೆ ಮುಂಬೈ ಪೊಲೀಸರ ತಂಡ ತೆರಳಿತ್ತು. ಕಳೆದ ಶನಿವಾರ ಮಂಡ್ಯದ ಹೆಗ್ಗಡಹಳ್ಳಿಯಲ್ಲಿ ಕುಮಾರ್ ಹೆಗ್ಡೆ ಪೊಲೀಸರ ಕೈಗೆ ಸಿಕ್ಕಿಬಿದ್ದಿದ್ದಾನೆ. ಕುಮಾರ್ ಹೆಗ್ಡೆಯನ್ನು ಮುಂಬೈ ಪೊಲೀಸರು ಬಂಧಿಸಿದ್ದಾರೆ.
ಏನಿದು ಪ್ರಕರಣ?
ಸಂತ್ರಸ್ತೆ ಹಾಗೂ ಕುಮಾರ್ ಹೆಗ್ಡೆ ಮಧ್ಯೆ 8 ವರ್ಷಗಳಿಂದ ಪರಿಚಯ-ಒಡನಾಟವಿದೆ. ಕಳೆದ ವರ್ಷದ ಜೂನ್ ತಿಂಗಳಿನಲ್ಲಿ ಮದುವೆಯಾಗುವುದಾಗಿ ಸಂತ್ರಸ್ತೆಗೆ ಕುಮಾರ್ ಹೆಗ್ಡೆ ಮಾತು ಕೊಟ್ಟಿದ್ದರು. ಮದುವೆಯಾಗುತ್ತಾರೆ ಎಂಬ ನಂಬಿಕೆ ಮೇಲೆ ಲಿವ್-ಇನ್ ರಿಲೇಶನ್‌ಶಿಪ್‌ನಲ್ಲಿ ಇರಲು ಸಂತ್ರಸ್ತೆ ಒಪ್ಪಿಗೆ ನೀಡಿದ್ದರು. ದೈಹಿಕ ಸಂಪರ್ಕಕ್ಕೆ ಸಂತ್ರಸ್ತೆ ಒಪ್ಪಿರಲಿಲ್ಲ. ಆದರೂ ಒತ್ತಾಯಪೂರ್ವಕವಾಗಿ ಕುಮಾರ್ ಹೆಗ್ಡೆ ದೈಹಿಕ ಸಂಪರ್ಕ ನಡೆಸಿದ್ದರು ಎಂದು ಸಂತ್ರಸ್ತೆ ದೂರಿದ್ದಾರೆ.
ಸಂತ್ರಸ್ತೆಯಿಂದ ಕುಮಾರ್ ಹೆಗ್ಡೆ 50 ಸಾವಿರ ರೂಪಾಯಿಯನ್ನೂ ಸಾಲ ಪಡೆದಿದ್ದರು. ತಮ್ಮ ತಾಯಿಗೆ ಅನಾರೋಗ್ಯ ಕಾಡುತ್ತಿದೆ, ಊರಿಗೆ ಹೋಗಬೇಕು ಎಂದು ಹಣ ಪಡೆದು ತೆರಳಿದ್ದ ಕುಮಾರ್ ಹೆಗ್ಡೆ ಬಳಿಕ ಸಂತ್ರಸ್ತೆಯ ಸಂಪರ್ಕಕ್ಕೆ ಸಿಕ್ಕಿರಲಿಲ್ಲ. ಹೀಗಾಗಿ, ಸಂತ್ರಸ್ತೆ ಮುಂಬೈ ಪೊಲೀಸ್ ಠಾಣೆಯ ಮೆಟ್ಟಿಲೇರಿದ್ದರು.
