ಒಂದೇ ದಿನಕ್ಕೆ ಕುಸಿದ ಲಸಿಕೆ ಅಭಿಯಾನದ ಉತ್ಸಾಹ: ಕರ್ನಾಟಕದಲ್ಲಿ ಎರಡನೇ ದಿನ ಶೇ 65ರಷ್ಟು ಇಳಿಕೆ

ಹೈಲೈಟ್ಸ್‌:

  • ನೂತನ ಲಸಿಕೆ ನೀತಿಯ ಮೊದಲ ದಿನ 88.16 ಲಕ್ಷ ಡೋಸ್ ಲಸಿಕೆ
  • ಎರಡನೆಯ ದಿನವಾದ ಮಂಗಳವಾರ ಲಸಿಕೆ ಡೋಸ್‌ಗಳಲ್ಲಿ ಭಾರಿ ಇಳಿಕೆ
  • 17 ಲಕ್ಷ ಡೋಸ್ ನೀಡಿದ್ದ ಮಧ್ಯಪ್ರದೇಶದಲ್ಲಿ 2ನೇ ದಿನ ಕೇವಲ 4,825 ಡೋಸ್
  • ಕರ್ನಾಟಕದಲ್ಲಿ ಏಳು ಲಕ್ಷಕ್ಕೂ ಅಧಿಕ ಡೋಸ್ ಲಸಿಕೆ ಇಳಿಕೆ

ಹೊಸದಿಲ್ಲಿ: 18 ವರ್ಷ ಮೇಲ್ಪಟ್ಟವರಿಗೆ ದೇಶಾದ್ಯಂತ ಉಚಿತ ಕೋವಿಡ್ 19 ಲಸಿಕೆ ನೀಡುವ ಹೊಸ ಅಭಿಯಾನಕ್ಕೆ ಸೋಮವಾರ ಅತ್ಯುತ್ಸಾಹದ ಪ್ರತಿಕ್ರಿಯೆ ಬಂದಿತ್ತು. ಮೊದಲ ದಿನವೇ ದಾಖಲೆಯ 88 ಲಕ್ಷ ಡೋಸ್ ಲಸಿಕೆ ನೀಡುವ ಮೂಲಕ ಗಮನ ಸೆಳೆದಿತ್ತು. ಆದರೆ ಆ ಉತ್ಸಾಹ ಒಂದೇ ದಿನಕ್ಕೆ ಮುಗಿದಿರುವಂತಿದೆ. ದೇಶದಲ್ಲಿ ಮಂಗಳವಾರ 54.22 ಲಕ್ಷ ಡೋಸ್ ಲಸಿಕೆಗಳನ್ನು ನೀಡಲಾಗಿದೆ. ಅಂದರೆ ಸುಮಾರು 34 ಲಕ್ಷ ಡೋಸ್‌ನಷ್ಟು ಕಡಿಮೆ ಲಸಿಕೆಗಳನ್ನು ನೀಡಲಾಗಿದೆ.

ಲಸಿಕೆ ನೀತಿ ಆರಂಭವಾದ ಎರಡನೇ ದಿನಕ್ಕೆ ಇಷ್ಟು ವ್ಯತ್ಯಾಸ ಉಂಟಾಗಿರುವುದು ಬೃಹತ್ ಪ್ರಮಾಣದಲ್ಲಿ ಕೈಗೊಂಡಿರುವ ಲಸಿಕೆ ಅಭಿಯಾನದ ಸುಸ್ಥಿರತೆಯ ಕುರಿತು ಅನುಮಾನಗಳನ್ನು ಮೂಡಿಸಿದೆ. ಸೋಮವಾರ ನೀಡಲಾಗಿದ್ದ 88 ಲಕ್ಷ ಡೋಸ್, ಚೀನಾದ ಬಳಿಕ ದೇಶವೊಂದು ನೀಡಲಾಗಿದ್ದ ಅತ್ಯಧಿಕ ದೈನಂದಿನ ಲಸಿಕೆ ಪ್ರಮಾಣವಾಗಿತ್ತು. ಆದರೆ ಮಂಗಳವಾರ ಅನೇಕ ರಾಜ್ಯಗಳಲ್ಲಿ ಲಸಿಕೆ ಕಾರ್ಯಕ್ರಮ ಭಾರಿ ಇಳಿಕೆ ಕಂಡಿದೆ. ಇದರಲ್ಲಿ ಕರ್ನಾಟಕವೂ ಸೇರಿದೆ.

ಅತ್ಯಧಿಕ ಡೋಸ್ ಲಸಿಕೆಗಳನ್ನು ನೀಡಿದ್ದ ಮೊದಲ 10 ರಾಜ್ಯಗಳಲ್ಲಿ ಬಿಜೆಪಿ ಆಡಳಿತವಿರುವ ಏಳು ರಾಜ್ಯಗಳಿದ್ದವು. ಈಗ ಈ ರಾಜ್ಯಗಳಲ್ಲಿ ಎರಡನೆಯ ದಿನ ಲಸಿಕೆ ಪ್ರಮಾಣ ಗಣನೀಯ ಕುಸಿತವಾಗಿದೆ. ಈ ವರ್ಷದ ಅಂತ್ಯಕ್ಕೆ ಎಲ್ಲ ವಯಸ್ಕರಿಗೂ ಸಂಪೂರ್ಣವಾಗಿ ಲಸಿಕೆ ನೀಡಿ ಪೂರೈಸಬೇಕು ಎಂದು ಕೇಂದ್ರ ಸರಕಾರ ಗುರಿ ಹೊಂದಿದೆ. ಈ ಗುರಿ ತಲುಪಲು ಪ್ರತಿ ದಿನ 97 ಲಕ್ಷ ಡೋಸ್ ಲಸಿಕೆಗಳನ್ನು ನೀಡಬೇಕಾಗುತ್ತದೆ. ಆದರೆ ಈಗಿನ ಲಸಿಕೆ ಪೂರೈಕೆ ಪ್ರಮಾಣವನ್ನು ಗಮನಿಸಿದರೆ ಅದು ಸಾಧ್ಯವೇ ಎಂಬ ಪ್ರಶ್ನೆಗಳು ಉದ್ಭವಿಸಿವೆ.

ಮಧ್ಯಪ್ರದೇಶದಲ್ಲಿ ಭಾರಿ ಕುಸಿತ
ಸೋಮವಾರ ಸಾರ್ವಕಾಲಿಕ ಅಧಿಕ ಪ್ರಮಾಣವಾದ 16.7 ಲಕ್ಷ ಡೋಸ್ ಲಸಿಕೆಗಳನ್ನು ನೀಡಿದ್ದ ಮಧ್ಯಪ್ರದೇಶದಲ್ಲಿ ಮಂಗಳವಾರ ಕೇವಲ 4,825 ಡೋಸ್ ಲಸಿಕೆಗಳನ್ನು ನೀಡಲಾಗಿದೆ. ಅಂದರೆ ಲಸಿಕೆ ಪ್ರಮಾಣ ಶೇ 0.3ಕ್ಕೆ ಕುಸಿದಿದೆ. ಹೊಸ ಲಸಿಕೆಯ ನೀತಿ ಆರಂಭವಾಗುವ ಹಿಂದಿನ ದಿನ, ಅಂದರೆ ಭಾನುವಾರ ಮಧ್ಯಪ್ರದೇಶದಲ್ಲಿ ನೀಡಲಾಗಿದ್ದ ಡೋಸ್ ಸಂಖ್ಯೆ 692 ಮಾತ್ರ ಎನ್ನುವುದು ಗಮನಾರ್ಹ.

ಕರ್ನಾಟಕದಲ್ಲಿ 65ರಷ್ಟು ಕಡಿಮೆ ಡೋಸ್
ಕರ್ನಾಟಕದಲ್ಲಿ ಸೋಮವಾರ 11,21,648 ಲಕ್ಷ ಡೋಸ್ ಲಸಿಕೆ ಕೊಡಲಾಗಿತ್ತು. ಆದರೆ ಮಂಗಳವಾರ ಅದು 3,92,427ಕ್ಕೆ ಇಳಿದಿದೆ. ಭಾನುವಾರ 68,172 ಡೋಸ್ ಲಸಿಕೆ ಕೊಡಲಾಗಿತ್ತು. ಅಭಿಯಾನದ ಮೊದಲ ದಿನವಾದ ಸೋಮವಾರ ಅತ್ಯಧಿಕ ಲಸಿಕೆಗಳನ್ನು ನೀಡಿದ ರಾಜ್ಯಗಳ ಪಟ್ಟಿಯಲ್ಲಿ ಕರ್ನಾಟಕ ಎರಡನೆಯ ಸ್ಥಾನದಲ್ಲಿತ್ತು. ರಾಜ್ಯದಲ್ಲಿ ಶೇ 65ರಷ್ಟು ಲಸಿಕೆ ಪ್ರಮಾಣ ಇಳಿಕೆಯಾಗಿದೆ.

ಉತ್ತರ ಪ್ರದೇಶ ತದ್ವಿರುದ್ಧ!
5.10 ಲಕ್ಷ ಡೋಸ್ ಲಸಿಕೆಗಳನ್ನು ನೀಡಿದ್ದ ಗುಜರಾತ್‌ನಲ್ಲಿ ಎರಡನೆಯ ದಿನಕ್ಕೆ 4.26 ಲಕ್ಷಕ್ಕೆ (ಶೇ 16) ಕುಸಿದಿದೆ. ಹರ್ಯಾಣದಲ್ಲಿ 4.96 ಲಕ್ಷ ಡೋಸ್ ನೀಡಿರುವುದು ದಾಖಲಾಗಿತ್ತು. ಆದರೆ ಮಂಗಳವಾರ 75,894 ಡೋಸ್‌ಗೆ ಇಳಿದಿದೆ.

ಆದರೆ ಈ ಎಲ್ಲ ರಾಜ್ಯಗಳಿಗೆ ವಿರುದ್ಧ ದಿಕ್ಕಿನಲ್ಲಿ ಉತ್ತರ ಪ್ರದೇಶ ಸಾಗಿದೆ. ಸೋಮವಾರ 7,25,898 ಡೋಸ್ ನೀಡುವ ಮೂಲಕ ಅಧಿಕ ಲಸಿಕೆಗಳನ್ನು ನೀಡಿದ ಮೂರನೇ ರಾಜ್ಯವಾಗಿದ್ದ ಉತ್ತರ ಪ್ರದೇಶದಲ್ಲಿ ಮಂಗಳವಾರ 7,96,458 ಡೋಸ್, ಅಂದರೆ ಸುಮಾರು 70 ಸಾವಿರ ಅಧಿಕ ಡೋಸ್ ಲಸಿಕೆಗಳನ್ನು ನೀಡಲಾಗಿದೆ.

S S Benakanalli

Founder , Director Of KK NEWS KANNADA _ S S BENAKANAHALLI

Leave a Reply

Your email address will not be published. Required fields are marked *