ಅದಾನಿ ಗ್ರೂಪ್‌ ತೆಕ್ಕೆಗೆ ಮುಂಬಯಿ ಏರ್‌ಪೋರ್ಟ್‌, 7ನೇ ವಿಮಾನ ನಿಲ್ದಾಣ ಕೈವಶ ಮಾಡಿಕೊಂಡ ಅದಾನಿ
ಹೊಸದಿಲ್ಲಿ: ಮುಂಬಯಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಆಡಳಿತವನ್ನು ಅದಾನಿ ಗ್ರೂಪ್‌ ಮಂಗಳವಾರ ವಹಿಸಿಕೊಂಡಿದೆ. ಮುಂಬಯಿ ಇಂಟರ್‌ನ್ಯಾಷನಲ್‌ ಏರ್‌ಪೋರ್ಟ್‌ ಲಿಮಿಟೆಡ್‌ನ (ಎಂಐಎಎಲ್‌) ಶೇ.74ರಷ್ಟು ಷೇರುಗಳನ್ನು ಅದಾನಿ ಗ್ರೂಪ್‌ನ ಅಂಗ ಸಂಸ್ಥೆ ಅದಾನಿ ಏರ್‌ಪೋರ್ಟ್‌ ಹೋಲ್ಡಿಂಗ್ಸ್‌ (ಎಎಎಚ್‌ಎಲ್‌) ತನ್ನದಾಗಿಸಿಕೊಂಡಿದೆ. ಇದರೊಂದಿಗೆ ಇದರ ಆಡಳಿತವನ್ನೂ ತನ್ನ ಕೈವಶ ಮಾಡಿಕೊಂಡಿದೆ.
ಮುಂಬಯಿ ಇಂಟರ್‌ನ್ಯಾಷನಲ್‌ ಏರ್‌ಪೋರ್ಟ್‌ ಲಿಮಿಟೆಡ್‌ನ ಉಳಿದ ಶೇ.26ರಷ್ಟು ಷೇರುಗಳನ್ನು ಭಾರತೀಯ ವಿಮಾನ ಪ್ರಾಧಿಕಾರ ಉಳಿಸಿಕೊಂಡಿದೆ. ಈ ಹಿಂದೆ ಇದರ ಆಡಳಿತಾತ್ಮಕ ನಿಯಂತ್ರಣ
ಜಿವಿಕೆ ಗ್ರೂಪ್‌ ಕೈಯಲ್ಲಿತ್ತು.
ಅದಾನಿ ಗ್ರೂಪ್‌ ವಿಮಾನ ನಿಲ್ದಾಣವನ್ನು ಮತ್ತಷ್ಟು ಅಭಿವೃದ್ಧಿಪಡಿಸಲಿದ್ದು, ಸ್ಥಳೀಯರಿಗೆ ಸಾವಿರಾರು ಉದ್ಯೋಗ ಕಲ್ಪಿಸಲಿದೆ ಎಂದು ಸಮೂಹ ಸಂಸ್ಥೆಯ ಅಧ್ಯಕ್ಷ ಗೌತಮ್‌ ಅದಾನಿ ಅವರು ಟ್ವೀಟ್‌ ಮಾಡಿದ್ದಾರೆ.
ಈ ಡೀಲ್‌ನೊಂದಿಗೆ ದೇಶ 7 ವಿಮಾನ ನಿಲ್ದಾಣಗಳನ್ನು ನಿರ್ವಹಿಸುತ್ತಿರುವ ಭಾರತದ ಅತಿ ದೊಡ್ಡ ಏರ್‌ಪೋರ್ಟ್‌ ನಿರ್ವಾಹಕ ಸಂಸ್ಥೆಯಾಗಿ ಅದಾನಿ ಗ್ರೂಪ್‌ ಹೊರಹೊಮ್ಮಿದೆ. ಅಹಮದಾಬಾದ್‌, ಲಖನೌ, ಮಂಗಳೂರು, ಜೈಪುರ, ಗುವಾಹಟಿ, ತಿರುವನಂತಪುರಂ ವಿಮಾನ ನಿಲ್ದಾಣಗಳನ್ನು ಅದಾನಿ ಗ್ರೂಪ್‌ ನಿರ್ವಹಿಸುತ್ತಿದೆ. ಇದರ ಜತೆಗೆ ನವಿ ಮುಂಬಯಿ ವಿಮಾನ ನಿಲ್ದಾಣದ ಕಾರ್ಯಾಚರಣೆಗಳನ್ನೂ ಅದಾನಿ ಗ್ರೂಪ್‌ ನಡೆಸುತ್ತಿದೆ
