ಸೇನೆಯ ಗೌಪ್ಯ ದಾಖಲೆಗಳನ್ನು ಪಾಕಿಸ್ತಾನಕ್ಕೆ ರವಾನಿಸುತ್ತಿದ್ದ ಭಾರತೀಯ ಯೋಧನ ಬಂಧನ!
ಹೈಲೈಟ್ಸ್‌:
- ಭಾರತೀಯ ಸೇನೆಯ ಗೌಪ್ಯ ದಾಖಲೆಗಳನ್ನು ಪಾಕಿಸ್ತಾನಕ್ಕೆ ರವಾನಿಸುತ್ತಿದ್ದ ಆರೋಪ
- ಪಾಕಿಸ್ತಾನದ ಬೇಹುಗಾರಿಕೆ ಸಂಸ್ಥೆ ‘ಐಎಸ್‌ಐ’ಗೆ ಪೂರೈಕೆ ಮಾಡುತ್ತಿದ್ದ ಯೋಧ
- ಖಚಿತ ಮಾಹಿತಿಯ ಮೇರೆಗೆ ಯೋಧ ಕರಂಜಿತ್‌ನನ್ನು ಬಂಧಿಸಿದ ಅಧಿಕಾರಿಗಳು
ಹೊಸದಿಲ್ಲಿ: ಭಾರತೀಯ ಸೇನೆಯ ಗೌಪ್ಯ ದಾಖಲೆಗಳನ್ನು ಪಾಕಿಸ್ತಾನದ ಬೇಹುಗಾರಿಕೆ ಸಂಸ್ಥೆ ‘ಐಎಸ್‌ಐ’ಗೆ ಪೂರೈಕೆ ಮಾಡುತ್ತಿದ್ದ ಆರೋಪದ ಮೇರೆಗೆ ಯೋಧನೊಬ್ಬರನ್ನು ಬಂಧಿಸಲಾಗಿದೆ.
ಆಗ್ರಾ ಕಂಟೋನ್ಮೆಂಟ್‌ನಲ್ಲಿ ಕಾರ್ಯನಿರತ ಯೋಧ ಕರಂಜಿತ್‌ ಬಂಧಿತ ಯೋಧ. ಇವರ ಜತೆಗೆ ರಾಜಸ್ಥಾನದ ಪೋಖ್ರನ್‌ ಸೇನಾ ನೆಲೆಗೆ ತರಕಾರಿ ಪೂರೈಸುತ್ತಿದ್ದ ಹಬೀಬುರ್‌ ರೆಹಮಾನ್‌ನನ್ನೂ ಬಂಧಿಸಲಾಗಿದೆ. ಮೊದಲು ರೆಹಮಾನ್‌ನನ್ನು ಬಂಧಿಸಿದಾಗ ಆತ ಯೋಧನ ಮೂಲಕ ತನಗೆ ರಹಸ್ಯ ಮಾಹಿತಿ ಸಿಗುತ್ತಿದ್ದ ಬಗ್ಗೆ ಬಾಯಿ ಬಿಟ್ಟಿದ್ದಾನೆ. ಇಬ್ಬರ ವಿರುದ್ಧವೂ ಅಧಿಕೃತ ಗೌಪ್ಯ ದಾಖಲೆಗಳ ರಕ್ಷಣೆ ಕಾಯಿದೆ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ.
ಪಾಕಿಸ್ತಾನದ ಸಿಂಧ್‌ ಪ್ರಾಂತ್ಯದಲ್ಲಿನ ನೆಂಟರನ್ನು ಕೆಲ ವರ್ಷಗಳ ಮುನ್ನ ಭೇಟಿಯಾಗಿದ್ದ ರೆಹಮಾನ್‌ಗೆ ಬೇಹುಗಾರಿಕೆ ಜಾಲದ ಪರಿಚಯವಾಗಿತ್ತು. ಹವಾಲಾ ಮೂಲಕ ರೆಹಮಾನ್‌ಗೆ ಹಣ ನೀಡಿ ಆಮಿಷ ಒಡ್ಡಲಾಗಿತ್ತು. ಆ ವೇಳೆ ಪೊಖ್ರನ್‌ನಲ್ಲಿ ನಿಯೋಜಿತರಾಗಿದ್ದ ಯೋಧ ಕರಂಜೀತ್‌ರ ಸ್ನೇಹ ಸಂಪಾದಿಸಿದ್ದ ರೆಹಮಾನ್‌, ಕೆಲವು ದಾಖಲೆಗಳನ್ನು ಸಂಗ್ರಹಿಸಿ ಪಾಕ್‌ ಗೂಢಚಾರರಿಗೆ ಒಪ್ಪಿಸಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ.
ರೆಹಮಾನ್‌ಗೆ ಪಾಕ್‌ನಿಂದ ಹಣ ವರ್ಗಾವಣೆಯಾಗುತ್ತಿದ್ದ ಬ್ಯಾಂಕ್‌ ಖಾತೆಗಳನ್ನು ಪೊಲೀಸರು ಜಪ್ತಿ ಮಾಡಿಕೊಂಡಿದ್ದಾರೆ. ಗೌಪ್ಯ ದಾಖಲೆ ಎಂದು ಗುರುತಿಸಲಾಗಿರುವ ದಾಖಲೆಗಳನ್ನು ಪಾಕ್‌ಗೆ ಪೂರೈಸುತ್ತಿದ್ದ ಆರೋಪದಲ್ಲಿ ಸೈನಿಕನ ಬಂಧನವನ್ನು ಭಾರತೀಯ ಸೇನೆ ಸಹ ಖಚಿತಪಡಿಸಿದೆ.
