Sayyeshaa Saigal: ತಾಯಿಯಾದ ಸಂಭ್ರಮದಲ್ಲಿ ‘ಯುವರತ್ನ’ ಸಿನಿಮಾ ನಾಯಕಿ ಸಾಯೇಷಾ ಸೈಗಲ್
ನಟ ಪುನೀತ್ ರಾಜ್‌ಕುಮಾರ್ ಅಭಿನಯದ ‘ಯುವರತ್ನ’ ಸಿನಿಮಾ ನಾಯಕಿ ಸಾಯೇಷಾ ಸೈಗಲ್ ಅವರು ಹೆಣ್ಣು ಮಗುವಿಗೆ ಜನ್ಮ ನೀಡಿದ್ದಾರೆ. ಈ ವಿಷಯವನ್ನು ತಮಿಳು ನಟ ವಿಶಾಲ್ ಸೋಶಿಯಲ್ ಮೀಡಿಯಾ ಮೂಲಕ ತಿಳಿಸಿದ್ದಾರೆ. ನಟ ಆರ್ಯ ಹಾಗೂ ಸಾಯೇಷಾ ದಂಪತಿ ತಾವು ಮೊದಲ ಮಗುವಿನ ನಿರೀಕ್ಷೆಯಲ್ಲಿರುವ ವಿಚಾರವನ್ನು ಇಲ್ಲಿಯವರೆಗೂ ಬಹಿರಂಗ ಮಾಡಿರಲಿಲ್ಲ.
ಮಾಹಿತಿ ನೀಡಿದ ವಿಶಾಲ್
“ಅಂಕಲ್ ಆಗುತ್ತಿದ್ದೇನೆ ಎಂದು ಹೇಳಲು ನನಗೆ ತುಂಬ ಖುಷಿಯಾಗುತ್ತಿದೆ. ನನ್ನ ಸಹೋದರ ಆರ್ಯ, ಸಾಯೇಷಾಗೆ ಹೆಣ್ಣುಮಗು ಜನನವಾಗಿದೆ. ಈಗ ಸಿನಿಮಾ ಶೂಟಿಂಗ್ ವೇಳೆ ನನ್ನೊಳಗಿನ ಭಾವನೆ ತಡೆದುಕೊಳ್ಳಲಾಗುತ್ತಿಲ್ಲ. ಮಗುವಿಗೆ ದೇವರು ಒಳ್ಳೆಯದನ್ನು ಮಾಡಲಿ, ಸಾಯೇಷಾ-ಆರ್ಯ ಜೋಡಿ ತಂದೆ-ತಾಯಿಯಾಗಿ ಜವಾಬ್ದಾರಿ ಪಡೆದುಕೊಂಡಿದ್ದಾರೆ” ಎಂದು ನಟ ವಿಶಾಲ್ ಟ್ವೀಟ್ ಮಾಡಿ ಮಾಹಿತಿ ನೀಡಿದ್ದರು.
ಸಾಯೇಷಾ-ಆರ್ಯ ನಡುವೆ 12 ವರ್ಷದ ವ್ಯತ್ಯಾಸವಿದೆ
ತಮಿಳು ನಟ ಆರ್ಯ ಜೊತೆ ‘ಟೆಡ್ಡಿ’, ‘ಗಜನಿಕಾಂತ್’, ‘ಕಾಪ್ಪಾನ್’ ಸಿನಿಮಾಗಳಲ್ಲಿ ಸಾಯೇಷಾ ಸೈಗಲ್, ಆರ್ಯ ಒಟ್ಟಾಗಿ ನಟಿಸಿದ್ದಾರೆ. ಸಿನಿಮಾದಲ್ಲಿ ನಟಿಸುತ್ತ ಈ ಜೋಡಿ ಮೊದಲು ಸ್ನೇಹಿತರಾಗಿ, ಆಮೇಲೆ ಪ್ರೇಮಿಗಳಾದರು. ಅನೇಕ ದಿನಗಳಿಂದ ಅವರಿಬ್ಬರು ಪ್ರೀತಿ ಮಾಡುತ್ತಿದ್ದಾರೆಂದು ಗಾಸಿಪ್ ಹರಡಿತ್ತು. ಆದರೆ ಆ ಬಗ್ಗೆ ಸಾಯೇಷಾ, ಆರ್ಯ ಮೌನ ಮುರಿದಿರಲಿಲ್ಲ. ಕೊನೆಯಲ್ಲಿ ಸಾಯೇಷಾ, ಆರ್ಯ ಮದುವೆಯಾಗುವ ವಿಚಾರ ತಿಳಿಸಿದ್ದರು. ಆರ್ಯ-ಸಾಯೇಷಾಗೆ 12 ವರ್ಷದ ವ್ಯತ್ಯಾಸವಿದೆ.
2019ರಲ್ಲಿ ಮದುವೆ
2019ರ ಮಾರ್ಚ್‌ನಲ್ಲಿ ಸಾಯೇಷಾ ಹಾಗೂ ಆರ್ಯ ವೈವಾಹಿಕ ಜೀವನಕ್ಕೆ ಕಾಲಿಟ್ಟಿದ್ದರು. ಮದುವೆಯ ನಂತರವೂ ಸಾಯೇಷಾ ಚಿತ್ರರಂಗದಲ್ಲಿ ಸಕ್ರಿಯವಾಗಿದ್ದರು. ಸೋಶಿಯಲ್ ಮೀಡಿಯಾದಲ್ಲಿ ಸಕ್ರಿಯವಾಗಿದ್ದ ಸಾಯೇಷಾ ಪತಿ ಆರ್ಯ ಜೊತೆಗಿನ ಫೋಟೋಗಳನ್ನು, ಡ್ಯಾನ್ಸ್ ವಿಡಿಯೋಗಳನ್ನು ಹಂಚಿಕೊಳ್ಳುತ್ತಿರುತ್ತಾರೆ, ಆದರೆ ಗರ್ಭಿಣಿಯಾಗಿರುವ ವಿಚಾರವನ್ನು ಮಾತ್ರ ತಿಳಿಸಿರಲಿಲ್ಲ.
